National Voters’ Day a ni a. Mizoram pawh district tinah he ni pual hun hman a ni.
-- Advertisement --
Aizawlah chuan Chief Electoral Officer office Mizoram huaihawtin National Voters’ Day vawi 13-na pualin inkhawm buatsaih a ni a. He hun hmanpuitu larsap Hari Babu Kambhampati chuan Mizoramin inthlan a lo hmachhawn tawwahte hlawhtlinna langsar tak a awm a, hei hi state dangte entawn mek a ni, tiin chhuanawm a tih thu a sawi.
Political party-te leh mipui thuawihna leh inthlan thianghlim kalpui tha tih leh ngaihhlutna avangin boruak muang tak hnuaiah inthlanpui thianghlim taka neih a ni thin tih sawiin, he hlawhtlinnaah hian a bikin Mizoram People’s Forum (MPF) leh Young Mizo Association (YMA) an thawhhlawk takzet tih a sawi.
Tunhnaiah Election Commission of India-in mitinten awlsam taka vote an thlak theih nan leh vote nei thei tura awlsam taka an inziahluhna turin hmalakna pawimawh tak tak a nei tih Hari Babu Kambhampati hian sawiin, “Taksa lam leh thildang avanga vote thlak chungchanga harshatna nei thin , abikin Persons with Disabilities (PwD) tan vote an thlak theihna kawng hrang hrangin ruahman a ni a, a tul anga siam belh mek zel a ni,” a ti.
Mizoram Election Department-in voter zinga khawhmuh lama harshatna nei (visually impaired voters) te tan Braille EPIC card a siamthar chuan phurna leh awlsamna a siam dawn a, vote thlak pawh a tihpun ngei a ring tih a sawi.
“Inthlanpui tilahlawhtling turin mawhphurhna pawimawh tak kan nei a; kan vote hlu tak hmangin ram kalsiam a tha zawnga her rem turin mitha nia kan hriatte kan aiawha rorel turin kan thlang thei a. a hman hi ngaihtha taka kan pawm a, kan zawm tlan a ngai a ni,” larsap hian a ti.
Kumin National Voters’ Day thupui atan “Vote thlak hi a pawimawh takzet a. vote thlak ngei ka tum” tih hman a ni a. NVD 2023 puala chief election commissioner Rajiv Kumar thuchah ngaihthlak a nih bakah NVD thutiam chhamrual a ni.
Voters’ Day hmannaah hian booth level officers (BLO) hnathawk thazualte hnenah ‘Best Performing BLO Award’ hlan an ni a. Vote nei thar thlanchhuah mi 10 hnenah larsap hian EPIC a hlan nghal a ni.
Mizoram State Legislative Assembly inthlan vawi 12 leh parliament inthlan vawi 11 neih a ni tawh a. 2013 MLA inthlanah khan India rama vawikhatna atan Mizoram Voter Verifiable Paper Audit Trail (VVPAT) hman tan a ni. Tunah hian Mizoram vote nei 842388 an awm a; heng zinga zaa 51.5 chu hmeichhe voter an ni. ECI dan thar angin vote neih tuma diltute tan qualifying date kumkhata vawikhat ni thin chu vawi li – January 1, April 1, July 1 leh October 1 a tih pun a ni a. January 1-a vote nei hman lo tan a kum leh nghah a ngai dawn tawh lo a ni.