Daily Newspaper

Vun tana tih loh tur

81

Vun hi kan taksa khuhtu a ni a, taksa peng lian ber leh pawimawh tak a ni, chuvangin a enkawl pawh kan uluk a ngai hle a ni. Vun tihnalhna chi hrang hrang a awm a, ei leh in te a pawimawh a, chutihrualin kan thil chin thin thenkhat vun tana tha lo a awm a, chu chu kan hriat a pawimawh. Tun tumah hian Times of India health section-in vun tana tih loh tur ni a an sawi te kan rawn tarlang e.

1. Facial oil hi arngeng nei chi tan chuan hman loh a him. Facial oil hi vun tihnalhna tha tak a ni a, mahse, vun chi hrang hrang tan a tha vek kher lo, a bik takin arngeng nei chi tan a tha lo. Oil hrang hrangah hian thil chi hrang hrang an telh a, oil thenkhat vun timamtu ni tura kan ngaih hi kan vun tibawltu a ni zawk thei. Arngeng nei chi i nih chuan lavender musk hman loh tawp tur a ni bawk.

2. Hmai hi tawngpawng phih vak vak loh tur. A chang chuan kan makeup hman te tihfai tumin hmai kan phih a, mahse, kan phih nasa leh lutuk thin. Hmai kan phih nasat leh lutuk hian hmai a tichhe zawk thei, kan hmaia natural oil awm kha kan phih fai a, ti mawm leh turin vunin a hma aia tam a rawn siamchhuak leh thin. Makeup remover tha chi atan sum sen hreh loh a tha.

3. Tui sa ver vawr tak mai hmanga inbual loh tur a ni. Kan taksa sil them thum te tihreh nan tui sa ver vawra inbual te chu a nuamin mi a tihahdam sawng sawng thei pawh a ni ang, mahse, hei hi vun tihchhiatna a ni a, vun a khawroin a thak duh. Vuna natural oil leh protein awm a tleuhfai daih thei. Chuvangin inbual nan tuilum kan hmang duh a nih pawhin tuilum deuh pep pep a tawk chauh, inbual zawhah pawh towel-a inhru tâwk tâwk lovin, dim deuh hleka indeh hul tur a ni a, lotion inhnawih that tur a ni.

4. Zu in tam loh tur. Zu hi vun tana thil tha lo tak mai a ni a, vun a ti khawroin a ti thim duh. Zu-ah hian sugar a tam avangin bawl te pawh a siam duh bawk. Zu no hnih khat chuan pawi a khawih tehchiam lo, mahse, vun êng nalh tak neih i duh chuan in tlem a tha ber.

5. Vuna bawl/arngeng awm te deh, kheuh leh khawi loh tur a ni. Arngeng te a lo awm chuan han deh deuh pawp mai te a chakawm thin, mahse, kan deh a kan khawih nasat zawh poh leh a chhungrilah vun kan tihliam nasa ting a ni mai a, chubakah kan kuttin kara bacteria awm te chu vunah an lo kai phah bawk thin. Vun bawl nuai leh kheuh neuh neuh te hian vun a tiupa hma duh bawk.

6. Sunscreen hman taimak tur a ni. Kan vun upat chakna chhan 90% hi chu ni zung vang a ni, chuvangin sunblock hman that tur a ni. Hmai tan sunblock kan hmanin 30SPF tal a ni tur a ni a, UVA rating 4-star emaw a aia sang (emaw PA++++) a ni tur a ni. SPF hian vun tichhetu nizung hlauhawm lakah min veng a, UVB ray-in vun a kang chhe tur a veng a, UVA (PA) chuan UVA ray-in vun chhungril a collagen a tichhe tur a veng ve thung. Chuvangin SPF leh UVA hi a pawimawh ve ve a ni.

7. Mit leh nghawng hi kan ngaihthah thin. Kan hmai vun a that viau laiin kan nghawng lam a lo dik leh si loh chuan a mawi famkim thei lo, chuvangin hmai kan enkawl ang thoin nghawng vun pawh enkawl that tur a ni a, mit tan pawh eye cream hman that tur a ni.

8. Exfoliating tih nasat lutuk hi vun tan a tha lo. Exfoliating chu vun cell thi tawh tihfai leh, vun hnawhtu bal te tihfai a ni a, vun a ti-fresh-in a ti thar riaua hriatna kan nei thin a, chuvangin tih nasat mah mah hi a awl riau a ni. Mahse, kan tih nasat leh lutuk chuan vun pawnlanga a vengtu awm kha kan hik fai vek thei a, environmental toxin leh infection risk a tisang thei tih hriat reng tur.

Read More>> Full>> Epaper Subscribe Now

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy