Wagner chief thihnain khawvel luah

Russia president Vladimir Putin chuan Yevgeny Prigozhin thihna chungchanga ngawih a chuh chu titawpin sawi a nei ta a.
Russia president chuan mercenary group president Prigozhin chu ‘talent nei tha tak’ mai ‘a nuna tihsual lian tak nei’ tiin a sawi.
Putin chuan thlawhna tla chhunga chuang mi 10 chhungte a tawrhpui thu a sawi a, Prigozhin a thi ngei tia sawi chianna a nei miah lo thung.
Thlawhna tlak hnuah eng vangin nge thlawhna chu a tlak tih leh a chhungah Prigozhin a chuang chiah em tih chu titi ber a ni a.
Ningani khan Pentagon thupuangtu chuan US chuan thlawhna tlaah Wagner chief chu tel ngei leh thi ngeia an ngaih thu an puang zui a.
Thlawhna tlakna Tver region a chengte chuan thil puak ring tak mai hriain chu mi hnuah van sang atanga thlawhna tla an hmuh zui tak thu an sawi a.
Ngaihdan pakhatah chuan thlawhnaah hian bomb phumruk nia ngaih a ni a, chu chu thlawhna tlak chhan zinga chhui chian mek zingah a tel bawk a. US official te chuan thlawhna tlak chhan ber nia an ngaih chu thlawhna chhunga thil puak vang tiin an sawi a.
Eng vanga thlawhnaah puak awm nge a nih sawi chian theih a la ni lo chungin bomb chu a chhan leh vang ni theia an ngaih a ni.
Ngaihdan dang pakhatah chuan Prigozhin nena inkungkaihna nei telegram channel chuan thlawhna chu Russian anti-aircraft forces in a kahthlak tia sawi a ni a. Mahse, chu chu finfiah a ni lo va, Pentagon chuan chutiang a ni tih theih nan information engmah an neih loh thu a sawi.
Moscow-a Sheremtyevo airport ground staff te chu thu zawhfiah mek niin he hmun hi St Petersburg pana thlawh chhuahna a ni a, CCTV footage te pawh enfiah mek a ni bawk.
Vladimir Putin chuan Prigozhin chu kum 1990 chho tir atanga a hriat tawh a nih thu sawiin ‘nun hnawk nuai nei’ tiin a sawi a.
Russian leader chuan Prigozhin leh a fighter te chu fakin a bik takin Ukraine-a an chet danah a fak.
“A nunah tihsual lian tak a nei, mahse amah leh midangte tan ka ngenna min tihhlawhtlinsak thin a ni,” tiin a sawi.

Wagner-a ingnhat te hma lam hun?
Africa ram tam tak te chu Wagner-a innghat bur an ni a. Chung ram zingah chuan Mali a ni zual a, an ram security thilah Wagner a innghat an ni. UN peacekeeper te an hnawtchhuak a, Wagner an ring zawk bawk a.
Mali hmar lam chu sorkar thunun a ni lo va, Tuareng seperatist leh islamist extremist al-Qaeda te nena inzawmna nei tena an thunun a ni a. An inngeih chuang lo nachungin inkhawih lo ve ve turin thuthlung an nei thung tia sawi a ni.
Mali sorkar chuan chung te laka him nan chuan international peacekeeping force te hnawlin Russia Wagner mercenary te chu a thlang zawk a. Mahse, tunah chuan an leader ber Yevgeny Prigozhin a thi ni ngeia ngaih a nih tak avangin Mali dinhmun chu chiang lo riau tur anga ngaih a ni.
Mali-ah hian kum 2012 khan sipaite chuan sorkar an paihthla a, chutih laiin rebel leh Islamic fighters te chuan hmar lam thunun thungin independent an puang a. Interim sorkar chuan French sipai te chu Islamist extremist te bei tura ngenin a chah chhuak a. Kum 2013 khan UN chuan remna vawnghim turin international force Minusma tih chu a dah ta a ni.
Kum 2020 khan sipaite chuan thuneihna lain civilian sorkar an paihthla leh a, khata tang khan sipai sorkar chuan France hnuchhawnin France sipaite pawh an tur haw ta a ni.
Kum 2021 khan Mali sorkar chuan Wagner te chu security tihsak tura sawma ngenin Russian mercenary group te chu an rama ram dang sipai awm an phal awm chhun an ni ta a. Mali sorkar chuan UN peacekeeping forces 12,000 te chu an ram chhuahsan turin a tizui ta nghal a ni.

Russia tan
Africa-a Wagner group te inbun lian zel chuan zawhna tam tak siamin US sorkar chuan Wagner te chu African rama gold leh diamond mines te thununah a puh a. Natural resources duha African ram te buaina nasa zawka pawt lutah a puh bawk.
Prigozhin te chuanna thlawhna a tlak hma lawk pawh hian Africa-ah a awm ngei tih finfiah a ni a. A hma lawk pawhin Prigozhin chuan Africa chu Wagner te chuan ‘zalen zawk’ in an siam tiin a sawi bawk a ni.
Mali hi khawvel huap pawha gold tharchhuak hnem ber ber zingah telin he metal pawimawh tak tharchhuah lamah pawh Africa ram zingah a langsar ber pawl a ni bawk a.
UN chuan tun hnaiah jihadist group te chu Mali, Niger leh Burkina Faso bikah an lian zual hle tiin a sawi a. Heng ram pathumte hi military coup thlenna vek niin Burkina Faso-ah kum 2022 khan civilian sorkar paihthlak niin Niger ah pawh kumin July thlaah paihthlakin a awm bawk.
Wagner hma lam hun a chian tak loh hle laiin Mali chuan engtiangin nge a security-ah innghahna a neih dawn a hriat theih loh hle bawk a. Mali ram dinhmun a chhiat zel chuan a chehhvel ram pumah nghawng nasa zawk a nei ngei tura ngaih a ni bawk.