Russia-a mercenary leader rothap zet mai Yevgeny Prigozhin chuan helna kalpuiin a sipai rualte chu Moscow panin a tir lut mup mup a, chu chuan Vladimir Putin thuneihnaah zawhna a siam nghal.
Russian president chuan a sangawizawnpui ni reng thin chu phatsantu tia sawiin leh ralthuam nena helna chawk chhuak tiin ‘hnunglam atanga invih’ tihialin a sawi a.
Chu chu kar kalta Inrinnia thil thleng kha niin mahse hemi ni vek hian Progozhin chuan a sipaite chu an hmunpui lamah let leh turin a ti leh vek thung.
“Darkar 24 chhungin Moscow hnaih tak 200km ah kan awm hman a ni. Heng chhung hian thisen farkhat pawh a chhuak lo,” tiin Prigozhin chuan a sawi zui bawk.
-- Advertisement --
Wagner boss-in sorkar paihthlak a tum em ni?
Prigozhin chuan an chetlak dan chu ‘march for justice’ tia sawiin sorkar paihthlak tumna a ni lo a ti a. A enga pawh chu ni se hun a duh rei lo em em thung.
Thla tam tak chhung chu Ukraine-a Russia-in military campaign a neihah a sulsutu ber niin Wagner mercenary group tana sipai sang tel lakhawmtu niin abik takin Russian jail-a tangho chu a hman ber an ni.
Ukraine indona kalpui dan chungchangh military chiefs te nena inbakkaih reng niin Russian military chief ten Wagner te chu 1 July-ah Russian sipaia hmeh belh luh vek an tum karah lungawilohna lantirna turu tak a nei zui ta a ni.
Wagner fighters te hian eastern Ukraine atangin Russian city Rostov-on-Don chu an lut hman a, hei hi Voronezh motorway kaltlanga Moscow luhna pawimawh a ni.
Russia-in Ukraine runa thla 16 tehmeuh chet a lak tawh laia chanchin danglam ber pakhat niin mahse Wagner sipai tena hmar lam an pan mek lai hian Belarus leader Alexander Lushenko inrawlhna karah inremna siamin a awmzui ta a ni.
|henkhat chuan tuna thil thleng hi Russia indona kalpuinaah Prigozhin tana hun tawpna angah an ngai mai thei a, mahse, a ni dawn hauh lo tih a ni thung.
Prigozhin chuan Belarus a pan nghal a, hetah chian criminal charge engmah a nei dawn lo tiin Kremlin chuan a sawi a. A fighter te pawh amnesty pek vek an ni dawn a ti zui bawk. Thisen chhuahna a thleng miah lo tia sawi chu a dik em? A la chiang lo tia sawi niin militay helicopter pakhat kahthlakin a awm tlat a.
Wagner vs Russia military chiefs
Prigozhin hian thla tam tak chhung chu Defence Minister Sergei Shoigu leh amred forces chief Valery Gerasimov te chu Wagner te kit leh ammunition mamawh pe thei lo tiin a ankhum tawh a.
Russian thuneitu tena mercenary group tin Ukraine indonaa inhnamhnawih te chu defence ministry contract ziahpui tura an tih chu Putin-an a pawm hnuah Prigozhin chuan dodalin hming a ziah hnan duh ta lo a ni.
23 June khan Russians te hnena thusawi a neihah Prigozhin chuan indona an kalpui chu dawt thu mai leh mi tlemte inhlawmkhawm te dinhmun san nana chhuanlam mai mai leh mipui leh president bumna tiin a sawi hial a.
Chutianga thusawina a neih hnu lawkah chet a la zui ta a ni. Kar kalta Zirtawpni atang khan ‘march for justice’ chu a kalpui zui a. “Mi 25,000 lai kan ni a, he rama buaina awm chhan hriatfiah kan tum a ni,” tia sawiin Prigozhin chuan, “Mi zawm duhtute pawhin min zawm thei ang,” a ti zui bawk.
Gen Sergei Surovikin, deputy commander of focres, Ukraine chuan ngenna siamin Prigozhin chu inphah hnuaia President Putin thuhnuaia intulut turin a ngen zui a.
A sipaite chu Rostov-on-Don ramri luhpuiin militarty HQ indonaa ralrelna ber nia ngaihah luhchhuahin an thunun zui a. Inrinni zing khan, “Military headquarter chungah kan lut ta,” tia sawiin a hnu lawkah khawpui pawh silai tum khat pawh hmet puak lova laka thununin a awm a ti zui bawk.
Chung thil thleng hnu chuan Russia FSB security service te chuan criminal case an ziak lut zui a. Moscow region pum chu inralringa siam nghal niin chu mai bakah Voronezh te thlengin ‘counter-terrorist operation regime’ khauh tak hnuaia dah nghal a ni.
Putin thusawi
Inrinni zing khan Valdimir Putin chuan state tin TV-ah inlungrualna ngenin minute nga chhung thu a sawi zui .
“Tuna kan thil tawn mek hi inphatsanna a ni,” tiin a sawi a. Prigozhin hming sawi lang chuang hauh si lovin military helna hmangin Russia phatsan a nia an phu tawka chhan let a ni ang a ti zui bawk.
Prigozhin chuan ram phatsan anga puhna chu chhang nghalin na takin president Putin chu sawisel letin ‘a che dik lo takzet’ a ti zui nghal thung.
A hma zawng chuan Prigozhin chuan a thinrimna Putin lakah a sawi ngai hauh lo tia sawi a ni a.
Ngeiawm taka ‘happy grandfather’ tia a sawi te chu indirect-a Putin a tihelna anga ngaih niin thla kalta khan indonaah grandfather ber laktlak loh a nih chuan engtiangin nge indonaah chakna chan theih a ni ang tiin a lo sawi tawh a ni.
Putin rorelna chona?
Prigozhin chuan Ukraine-a Russia indonaah zawhna a nei lo tia sawiin ‘nuihza siam thiam’ in thuneihna a chang mek a ti thung a.
President leadership chu dodalna a neih loh thu sawiin chutihrual erawh chuan military demand a neihte tihhlawhtlinsak a nih loh chuan Mocow panin a kal zel ang a ti thung.
Thil a thleng zung zung bawk si a, Vladimir Putin chu hruaitu laktlak loh tak angin a lang hman hial tia sawi niin mahse Inrinni zing lamah Putin zawlpui tha Belarus president Alexander Lukashenko chuan inremna siam a nih thu a puang ta a ni.
Inremna siam ang chuan Prigozhin chuan Rusisa chhuahsanin criminal charge nei hauh lovin Belarus a pan ang tih a ni a, a hnu lawkah car hmangin Rostov a chhuahsan lai tihlan a ni.
Chu mai bakah Wagner fighter te chu thubuai siamsak an ni dawn hauh lo bawk.
Putin hma lam hun?
Vladimir Putin beisei angin thil a awm lo hle tia sawi niin amah pawh a landanah a chauh hmel tia sawi a ni bawk a. Thunei taka a rorelna ramah ni khat chu buai niai nuai a thleng a ni ber.
A che chhe lutuk tur chu Belarus leader-in a chhanhim tia sawi a ni a, Lukashenko bawk hi Russia chuan kum 2020-a an ram inthlana thil fel lo awm tia lungawilohna nasa tak awm laia an chah luh a ni tawh bawk.
Ukrainian presidency chuan Putin chu tihhmingchhiatin a awm a ti a, chutih rualin ngaihdan dang awm bawkin Russians-te chuan Putin presidency thlaktu tur an duh tawh an ti bawk.
Tu nge Prigozhin?
Vladimir Putin home city St Petersburg khaw chhuak a ni a. Kum 1979 khan kum 18 lek a nihin thubuai nei tawh niin rukruk avangin kum hnih leh a chanve lung in tang tura tih a ni tawh a. A hnu lawkah rukruk leh inbumna kaihhnawihah kum 13 lungin tang tura tih ni lehin kum kua lung in a tang a ni.
Lung in atanga a chhuah hnuah St Petersburg-ah hot dog hralhin sumdawn a tan a, a sumdawnna lamah che fuh viauin kum 1990 chhova dan mumal loh lai chu remchangah hmangin Prigozhin chuan khawpuiah restaurant chain liantham takin a siam zui a ni.
A restaurant siam zinga pakhat chu New Island tih niin Neva River ah lawng hmanga zin theihna a ni a. Vladimir Putin chuan a ngainat em avangin he hmunah hian foreign guest te a kalpui thin an ti a, chu chu Putin nena an inhmuha inhmelhriat tanna nia ngaih a ni.
“Vladimir Putin chuan dignitary te hnenah eitur kan pekah harsatna ka nei lo tih a hria a,” tia sawiin Prigozhin chuan, “Japanese Prime Minister Mori nena an lokal tumin kan inhmu a ni,” tiin a sawi bawk.
Yoshiro Mori chuan April 2000 khan St Petersburg hi tlawhin chu chu Vladimir Putin rorel intan hun a ni bawk. Putin chuan Prigozhin hi ring zui hlein kum 2003 khan New Island-ah chuan a piancham a lawm nghe nghe a ni.
A kum leh lawkah Prigozhin a catering company Concord te chuan Kremlin food supply contract an hmu zui a, hei vang hian “Putin’s chef” tia hriatlar a nih phah a. Prigozhin firm chuan military leh state-run school-a catering hlawk ber ber te chu an chang zui a ni.
Wagner Group indin dan?
Kum 2014-a Russia-in Ukraine a run hnuah Prigozhin chu sumdawng satliah a ni lo tih a lang tan a. A thuneihna hnuaia awm private military company te chu eastern Donbas region-ah Ukrainian force te bei tura tirh luhin an awm a ni.
Chung hote chu an commander hmasa bera inbiak nana an hman Wagner tih hming chawia hriat lar an ni zui a. Prigozhin hi Nazi Germany chanchinin a hneh deuh tia sawi a ni bawk.
Ukraine mai bakah hian Wagner te chu Africa hmun hrang hrangah Kremlin agenda tihlawhtling tura dahin an awm a, Syria-ah te leh Mali ah te pawh chet an la tawh bawk. Nun rawng tak anga sawi niin Syria rama an chet lak dan phei chu turu taka sawi a ni.
Bots leh troll
Ralthuam mai a ni lo Yevgeny Prigozhin hi politics khawvelah pawh keyboard hmangin a inhnamhnawih nasa hle tih a ni bawk.
Kum tam tak chhung chu ‘troll farms’ leh ‘bot factory’ kalpuitu tia sawi niin social media leh website te chu Kremlin thlir dan thehdarh nana thiam taka hmangtu a ni a. Chung atan chuan St Petersburg a inbun Internet Research Agency (IRA) te kum 2016 US presidential election a inhnamhnawiha puhte chu a hmang tangkai hle.
IRA te hi disinformation campaign lam thiam tak te niin Ukraine te chu bei reng mai niin UK sorkar chuan eng ‘cyber-soldier’ te hi Prigozhin nena inthlunzawm niin UK, South Africa leh India-te pawh an tibuai tawh a ti.
Vladimir Putin tana Prigozhin pawimawhna?
Eng vangin nge Kremlin chuan Prigozhin te ang khawvel hmun tina disinformation leh military campaign neih nana hman a duh?
A chhan ber nia sawi chu ‘kan tih a ni lo’ an tih theih nan a ni a. Private operative te hman mai khan Russian sorkar chuan operation pawimawh tak takah kut a sil phah thei dawn a ni.
Eng vangin nge Prigozhin kher chu hman a nih? Chu zawhna chu journalist Ilya Zhegulev, Prigozhin chanchin zirchiangtu chuan a chhan hrang hrang a awm tiin a sawi a.
“Thil duhawm lo tih a hreh tlat lo va. Hmingchhiatna thilah engmah hlauh tur a nei ve lo,” tiin Zhegulev chuan a sawi.
Yevgeny Prigozhin tunhma hunin awmzia a nei a ti bawk a. “Vladimir Putin chuan mi felfai tak sawiselna awm mang lote a duh lo, a chhan chu thunun an har a ti a. Chu ngaihdan atang chuan Prigozhin chu duhthusam a ni,” tiin Ilya Zhegulev chuan a sawi.