Wagner, Prigozhin, Putin leh Shoigu: inelna avanga inhmelmakna nasa tak thleng chu

Wagner helna chuan darkar 24 chauh a awh a. Mahse, inthikna, inelna leh dinhmun sang inchuhna chu a thla mai ni lo a kuma kum inmung tawh a ni thung.
Russia sipai leh a chhehvel buaia meizanghlaptu ber chu Yevgeny Prigozhin, Wagner paramilitary group dintu leh Russia military lian lutuk hotu lu pahnih – Sergei Shoigu leh Valery Gerasimov te an ni.
Prigozhin hi criminal hlui kum 1980 chhova organised crime nena inkaihhnawihna nei niin kum tam tak lung in pawh tang hial tawh leh Kremlin-in a vulh len leh chuta a ropuina atana puitu ber chu President Vladimir Putin ni bawk a ni.
Kum 2014 khan Prigozhin hian Wagner mercenary group a din a, hun rei lo te hnuah khawvel hmun hrang hranga Putin-an Russian influence neih nana a hman tangkai em em an ni zui a ni. Wagner te hmang hian Putin chuan chet lain Syria-ah pawh Bashar Al-Assad an tichak a, Mali-ah pawh French influence an chuhsak bawk a.
Nikum thleng khan Prigozhin chuan Wagner group thununtu tia sawina chu pha char charin British court ah pawh private militia Wagner group kalpuitu tia puhtu Bellingcat journalist Elliot Higgins chu a khin phah a. Mahse, thil nihna diktak chu phat reng theihin a awm chuang lo.
Prigozhin hi tharumthawhna, eirukna leh ambition sang tak neiin Russian modern state tun hnai kum 24 chhunga President Vladimir Putin-an a dinah dinhmun sang ber ber chang zinga langsar tak a ni.
A thuneihna leh thiltihtheihna a sang hle chungin Putin-a adviser tlemte zingah a tel pha chuang lo va, Prigozhin hian Moscow officials te chu a dim ngai lo, eiruk hmang, thatchhia titein a puh hmiah hmiah mai zel.
A bik taka a huat an awm a, chu chu Russia head of military Valery Gerasimov leh Defence Minister Sergei Shoigu te an ni.
Putin-a adviser rinrawl ber ber dang te ang lo takin Shoigu hi St Petersburg khawchhuak a ni ve lo va, Russian-Monglian border-a thingtlang khaw tereuhte chhuak a ni.
Russian military kum sawm chuang a enkawl tawh chungin Shoigu hian uniform a la ha ve ngai lo va, Communist Party hun lai khan nihna sang tak nei tawh niin kum 1990 chho khan emergency ministry head a ni daih tawh bawk.
Gerasimov erawh hi chu army dik tak a ni thung a. Kum 1990 chhova Chechnya a helna tudaitu anga ngaih niin post-Soviet military chief ni rei ber tawh a ni bawk.
Russia power humhim nan Prigozhin hian chet la angin a insawi thin a, Russia sipaite hlawh pek aia tam pein top special forces operator te chu a sawm lut thin tia sawi niin chu chuan Prigozhin leh Russian sipaiah khi a siam an ti thin.
Mahse chung zawng ai chuan Russia-in Ukraine a run hnuah leh a bik takin Bakhmut-a inbeihna nasa tak thlen hnua Wagner sipaite sang tam takin nunna an chan phah hnuah Prigozhin chuan Russian military elite te a huatna chu phochhuak tak takin a awm ta an ti.
Bakhmut khawpui mi 70,000 vel lek chenna lak tuma beihna chuan raldo lama mithiamte mak tih a hlawh reng a. Bakhmut hian military thilah pawimawhna thuk a nei lo an ti a, mahse, Prigozhin chuan Russian sipaite chet chhiat zel karah Bakhmut lak a nih chuan a dinhmun a san phah tura ngaih vang an ti bawk.
Prigozhin chuan Shoigu leh Gerasimov te chu Soledar khawpui lak angah te pawh Wagner te hnehna chanah credit lak tumah a puh a. Heng khawpuite ang lak a nih theih nan hian thi mai tura lung in tang mek te chu paramilitary troops atana lak thin niin ral hmatawngah dahin an awm thin a ni.
Chung karah chuan Kremlin lam chuan Wagner leh Russian military te inkar chhia chu siamthat tumna an nei hauh lo bawk a. Inel ber berte inbakkaiha siam zui zel hi President Putin-a style an ti a. Power centre ah influence nei duha pawl pahnih inbeihna chu remti thinin amah chona awm thei lakah a him phah zel tih ngaihdan a nei an ti.
Daniel Triestman, professor of political science, University of California, Los Angeles chuan nikum lam khan Putin chuan a sorkar paihtlak a nih ngai loh nan ‘tripwires’ a siam tia sawiin officials te silai kengin an thlawpte chuan amah phatsanna an neih miah theih loh nan chet a la thin tiin a sawi.
Chutiang ngaihdanah chuan Shoigu chu Wagner ten an thlithlai rengin a awm a, Wagner te pawh military ten an vau reng bawk tho a. Chung kara a chung bera awm chu Putin tho niin chess master-in board a system balance siam nana a duh ang anga a sawn kual theih angin thil a siam an ti bawk.
Prigozhin chuan Putin chu langsar takin a sawisel ngai hauh lo va, February 2022 atanga Ukraine run a hlawhtlin theih lohna chhan chu Putin chu a commander tena an kaihhruai dik loh vang a ti thung.
Putin tan pawh mercenary boss in tawngkam a neih chu a sipaite dem nan a hman theih phah a, Putin chuan langsar takin Shoigu leh Geramisov te chu Ukraine runa hmalak chak theih loh chhanah a sawisel bawk.
Mahse tun hnaiah Putin-a strategy chu a derthawng ta tlat a. Prigozhin chuan Bakhmut lak an tumnaah Russian military-te chu ammunition pe tha duh lovah a puh a, a aupui chuai chuai reng a. “Shoigu! Gerasimov khawiah nge ammunition? Volunteer niin nunna chan tura an penchhuah laiin nang ni chu in mahogany office-ah in inchawm thau a ni,” tiin Prigozhin chuan Telegram-ah video a post nghe nghe a.
Prigozhin-an Telegram kaltlanga a lungawilohna a sawi chhuah ni hian Putin chuan Shoigu chuan Moscow ah kovin a titipui tiin US intelligence documents American airman Jack teixera put ru chuan a tarlang a.
Moscow lamah Shoigu chuan Prigozhin influence san zel loh nana chet a lak laiin amah pawh uniform service a neih tlem avanga sawisel a ni tho va, mahse, Russian political system lama a pawimawhna chu haider theih a ni lo thung. Kum 1991 atang khan Kremlin-ah eng kawng emaw ti talin mi pawimawh ber pawlah a la tang reng thei a, Putin adviser nihna pawh chelh rei ber a ni bawk.
10 June khan a ruahmanna sawiin chutah chuan ‘volunteer formations’ hei hi (Wagner group te ang sawina) te chu ministry of defence nena contract ziak tura tih an ni ang a, sipaiah lakluh niin legal status an nei ang a ti. Volunteer formation hi July 1 thlenga kalpui tura tih a ni a.
He ruahmannaah hian Wagner tih hming chu ziah lan a ni lo va, mahse, a tum ber chu Prigozhin influence chhuhsak tumna a ni a, chutak chu Wagner boss ti thinur em emtu chu a ni ta a ni.
“Wagner-in Shoigu nen contract kan ziak hauh lovang” tiin Prigozhin chu ang nghalin, “Shoigu hian military formation mumal pawh a siam thei lo,” a ti zui bawk.
Shoigu chuan President Putin remtihna tel lo chuan hma a la dawn hauh lo va, chu tak chuan Prigozhin chu a ti lungni lo em em mai a ni. Prigoizhin chaun Russia-in ‘special military operations’ tia a kalpui a sawiselna leh elsenna a thla a thla a kalpui hnuah President Putin chuan amah ai chuan a defence chief te chu a thlang zawk pawh a tih theih.
Chutah tak chuan Prigozhin chuan a independent force Wagner Group te a thunun reng theih nan chuan tihtur awm chhun nia a ngaih chuan Russian Ministry of Defence sut a ni tih a ni. Wagner te chuan Russian field commander an man phawt a, chet an la zui ta a ni.
Kar kalta Zirtawpni khan mercenary boss chuan Russian defence ministry sawiselna a neih tawha na ber chhak chhuakin President Putin ngei pawhin chhuanlama a sawi Ukraine run chu Nato leh Nazi te hmehmihna tur a tih chu Prigozhin chuan Shoigu an medal tam zawk hlawhchhuah a duhna leh Marshal nih a tumna vang a ti zui ta a ni.
“Ministry of Defence hian mipui bum an tum a, president bum an tum a ni,” tiin Prigozhin chuan Telegram video-ah a post zui nghe nghe a ni.
Russia Defence Ministry-in Wagner Group te thunun an tum thu an sawi atanga kar hnih pawh tling lovah Prigozhin chuan a sipaite chu Ukraine chhuahsan tirin Russian city Rostov a pan tir a.
Sawi awmah chuan prigozhin hian a helna tihtawp a remtihna chhan chu, Putin-an defence ministry ah dinhmun sang pek a tiam vang tia sawi a ni a. A dik ang em tih erawh hunin a hril tur niin tu ten nge Shoigu leh Gerasimov te chu thlak ang tih pawh a chiang chuang lo.
Prigozhin nena inhnaih tak thin mahse a helna ngaithei lova tawng chhuak Gen Sergei Surovkin chu dinhmun sang ber chelh thei tura ngaih a ni a. General Armageddon tia hriat lar niin civilian te pawh chakna an chan theih nan chuan bomb khum duh mai chi a ni.
Prigozhin-an Moscow pana helna a chawk chhuak kha Russia a hard-line pro-war element te chuan an tei thei dawn lo tia sawi a ni a, chutih rual erawh chuan Wagner mi leh sate chuan defence ministry nena contract ziah chu an duh dawn lo tih a ni bawk.
Prigozhin hel hnu lawkah hian Russian sipaite chuan St Petersburg a Wagner headquarter chu luhchhuah nghalin chutah chuan $ 38 million pawisa fai hmuh niin hren a ni zui a, he sum hi Prigozhin chuan a sipai thi chhungte chhawmdawlna tur tiin a sawi.
Wagner-te che thei lova siam an nih hian Shoigu leh Gerasimov te chuan an tana hlauhawm thei bera ngaih an dah tha ta anga ngaih theih a ni a. Mahse, Russia-ah hian private military compnay 10 vel lai la awm anga ngaih a ni a, a then te chu oil giants leh oligarchs tena an enkawl te an ni.
Shoigu ngei pawh hian ama pualin company Patriot PMC a nei tho a, Ukraine-ah chet an la reng a, Wagner te nena inbakkaih rengna a ni tiin US state department chuan a sawi bawk.