Waqf dan thar duh loh lantirnaah buaina chhuak leh

Waqf dan thar duh loh lantirnaah buaina chhuak leh
Murshidabad-a a thlen hnuah West Bengal-a South 24 Parganas-ah Indian Secular Front (ISF)-in Waqf (Amendment) Act duh lohna an lantirnaah tharum thawhna thleng lehin police nen nasa takin an innawr.
Bhangar-a thil thlengah hian mi tam takin hliam tuarin police lirthei eng emaw zat hal a ni tih PTI chuan a tar lang.
A hnuah West Bengal police chuan Bhangar-ah hian boruak hmeh mih tawh a nih thu leh bungrua tichhe zawnga chete lakah thubuai an ziah luh thu an sawi.
“Vantlang chu titi lengvak thehdarh lo tura ngen an ni a. Thu dik lo thehdarh chu na taka hrem an ni ang,” tiin Kolkata police chuan X-ah an tar lang.
ISF-te hian Waqf (Amendment) Act duh loh lantira Kolkata lailia Ramlila Maidan pana kawng an zawh chu police-in an dang a, kawng zawhah hian an party hruaitu, Bhangar MLA Naushad Siddique chuan thu a sawi.
Police chuan kawng zawhte hi Basanti Highway-a Bhojerhat bulah an lo dang a, mipuite hi Bhangar leh an chhehvela Minakhan leh Sandeshkhali-a ISF worker-te an nih thu an sawi.
Police-in an dan hi sut tlang tuma an nawr hnuah kut an inthlak zui ta a. “Police lirthei thenkhat an hal a, police tlemin hliam an tuar,” tiin police officer-in a sawi.
Innawrna avang hian lirthei pawh a kal thei lo va, ISF-te hi kawngah an thu bawk.
Police thahnem takin boruak thunun tumin an bei a. A chhehvelah pawh inrin a ni a, a hnuah mipui hi an tin darh ta a ni.
Thil thleng hmutute chuan police hian tiangin mipui hi an vua a, Ramlila Ground-a pungkhawm turin police phalna pawh an nei lo niin an sawi tih PTI chuan a tar lang.
Tharum thawhna a thleng chung hian Siddique-a chuan Ramlila Maidan-ah thu a sawi tho va, Waqf (Amendment) Act chu hlih lehnghal a phut.
ISF hian BJP chu sakhuate inkara inngeih lohna thlen tumah an puh a, Bengal-a Trinamool Congress sorkar chu eptute lungawi lohna hmeh mih tuma beiah an puh bawk.
“Chief minister-in Waqf dan thar hi West Bengal-ah hman a ni dawn lo tih a sawi a, tha kan ti hle a. Hetih lai hian engvangin nge police hian kan worker-ten muanawm taka kawng an zawh an lo dantir? Lungawi lohna lantir hi Trinamool Congress tan chauh phal em ni?” a ti.
Waqf (Amendment) Act duh lohna lantira tharum thawhna hi Inrinni pawh khan Murshidabad bakah Suti, Dhulian leh Jangipur-ah pawh a thleng a, mi pathum an thi.
Tharum thawhna thlenna hmunah te hian dawr, in leh khualbukte pawh hal a ni.
Hindu 400 chuangin tharum thawhna thlenna, Murshidabad-a Samserganj tlanchhiatsanin Bhagirathi River kânin Malda an pan nia sawi a ni bawk.