Wayanad-ah Priyanka Gandhi Cadra

Congress leader Priyanka Gandhi Vadra chuan Kerala-a Wayanad Lok Sabha seat bypoll ah chuhin electoral debut a nei dawn a. A unaupa leh Congress chief hlui Rahul Gandhi chuan Rae Bareli seat, Uttar Pradesh chu a thlang ta zawk a ni.
Rahul Gandhi chuan Wayanad leh Rae Bareli seat chu tun hnaia Lok Sabha inthlanah chuhin hnehna a chang ve ve a. Mahse, dan in a phut angin seat khawi maw zawk zawk ni 14 chhunga a chhuahsan a ngaih avangin Rae Bareli a thlang ta zakw a ni.
Rahul Gandhi thutlukna hi Congress president Mallikarjun Kharge chuan darkar hnih chuang ngaihtuaha an thutkhawm hnuah a chenna in atangin a puang a ni.
Rahul Gandhi chuan thutlukna siam har tak a nih thu sawiin Rae Bareli leh Wayanad mipuite nen inzawmna thuktak an neih vang a nih thu a sawi a. “Rae Bareli nen inzawmna upa tak kan nei a, an ai ka awh hi ka lawm a ni. Thutlukna awlsam a ni lo va, Wayanad leh Rae Bareli nen inzawmna thuktak kan neih vang a ni” tiin Rahul Gandhi chuan a sawi.
Priyanka Gandhi Vadra pawhin, “Wayanad aiawha ka ding tur hi ka lawm a, Rahul Gandhi a awm lo tih an hriat miah loh nan hma ka la ang. Amah ngeiin ka lo kal fo ang a tih ang bawkin, an aiawh turin theihtawpa thawkrimin an aiawh zo turin hna ka thawk ang” tiin Vadra chuan a sawi.
Priyanka chuan Rae Bareli leh Amethi nena an inzawmna chu chhut chah theih loh a nih thu sawiin kum 20 chuang zet a thawh tawh thu sawiin Rae Bareli-ah a unaupa tana a thawh chhunzawm zel tur thu a sawi bawk.
Piryanka hian Lok Sabha bypoll ah hnehna a chang a nih chuan Gandhi family member pathum te chu a tum khat nan Parliament-ah an tel vek dawn a ni.
“Constituency pahnih ten MP pahnih an nei turah ngai ila” tia sawiin Rahul Gandhi chian tun hnai kum nga chhungin Wayanad MP a nihnaah tawnhriat lawmawm leh duhawm tak a neih thu a sawi bawk a.
“Wayanad mipui ten min dinpui tlat a, hmangaihna leh ngainatna, thlawpna leh chakna hun harsa karah min pe a. Ka damchhungin ka hre reng ang” tiin Rahul Gandhi chuan a sawi bawk.
Lok Sabha a Leader of Opposition (LoP) nihna a pawm tura nawr a nih chungchangah Rahul chuan Kharge chuan Congress Working Committee resolution siama LoP ni tura an tihna pawm lo thei lova turin min vau a ni, tia sawiin Rahul Gandhi chuan ‘Party president a nih angin min vau a ni’ tiin nui chungin a sawi bawk.
“Dan angin Rahul hian a seat pakhat zawk a chhuahsan a ngai a, Thawhlehni hi hun tawp a nih avangin party chuan Rae Bareli chu Rahul-an chang zui se kan ti a ni. He seat hi Gandhi family ten kum tam an lo enkawl tawh a ni a, Rae Bareli mipuite tan leh kan party worker te pawhin party tana thaah kan ngai a ni” tiin Kharge chuan a sawi.
Rae Bareli-ah hian kum 2024 Lok Sabha inthlanah khan Rahul Gandhi chuan a nu Sonia Gandhi-in Rajya Sabha lama a kalsan tak avangin a ding a. Kum 2004 atang khan term nga zet chu Sonia Gandhi chuan Ra Bareli ai a awh tawh a ni.
India-in General Election a neih hmasak ber atangin Congress chuan Rae Bareli ah chakna tum 18 an chang tawh a, he seat a Congress aiawha chakna chang hmasa ber chu Rahul Gandhi pu Feroze Gandhi a ni a, a pi leh Prime Minister hlui Indira Gandhi pawhin tum thum chakna a channa hmun a ni bawk.
Gandhi family legacy piah lamah Congress party chuan Rae Bareli seat thlan zawk chu Rahul Gandhi an Congress tena Akhilesh Yadav kaihhruai Samajwadi Party nena kum 2027 Uttar Pradesh Assembly Election a an thawhho zui zel theihna tur hisap nia ngaih a ni a. Chubakah Priyanka Lok Sabha a a awm chuan Opposition ten thusawi thiam fing tak an neih belh dawn tihna a ni bawk.
“Rahul Gandhi leh Priyanka Gandhi tena Parliament-a an awm dun chuan mipui aw a thangkhawk zual zawk ang” tiin Assam State atanga Congress MP Gaurav Gogoi chuan social media platform X ah a sawi zui nghal bawk.