Weight loss nan avacado

Kan chaw eiah avacado hmeh ila, min tipuar rei a, ril tam leh hma tur a veng a, hmawmsawm kan ei tur a veng nasa hle a, chuvangin thau uchuak (obese) leh intihcher duhte tan avacado chu chaw tha tak a nih thu mithiam ten an sawi.
Illinois Institute of Technology a Center for Nutrition a mithiam ten zirchianna an neih a an hmuh danin mithau lutuk leh intihcher duh te tan avacado hian riltam tur a ven theih avangin kan diet tlema tidanglam hretin, kan hriselna kawngah nghawng nasa takin a nei thei niin an tarlang a, an zirchianna chungchang hi journal Nutrients-ah tarlan a ni.
Mithiam te chuan avacado eiin rilru lamah engtiangin nge nghawng a neih tih te pawh an zir a, avacado ei te chu an ei atanga darkar ruk chhung a an thil eiin a nghawng dan te an zirbing a ni. He zirchianna hi mi thau uchuak 31-ah neih a ni a, clinical trial a thlan chhuah an ni. Avacado ei chuan insulin leh blood glucose-ah nghawng sawi tham a nei lo a, diebetes leh lung lam natna risk tihniam thei zawk a ni.
Center for Nutrition-a an director Burton-Freeman chuan, “Hman atanga vawiin thlengin thau/mawm hi thau uchuakna thlentu bulpui berah kan ngai thin a, tunah chuan carbohydrate hian riltam dan a nghawng theih dan leh weight control atan a that theih dan hi zirchian zel a ni. Thil pakhat ‘chumi chu a tha ber e’ tih theih hi a awm lo. Mahse, kan ei leh in-in rilru thlenga a nghawng dan hriat hi a pawimawh, chu chu weight control-ah a tangkai hle a ni,” a ti.
Tufts University-a mithiam ten zirchianna an neihah pawh avocado hian thil hriat theihna leh chhinchhiah theihna (memory) a tichak thei niin an lo sawi a, zirchianna an hotu Elizabeth Johnson chuan, “Avocado-ah hian monounsaturated fats, fibre, lutein leh bioactive dang a tam a, chu chuan neural lutein level a siamtha a, chu chu mit tana chaw tha a ni mai lo va, thluak tan pawh a tha hle a ni,” a ti.