Ni khat thil thu-ah khuarel chhiatna vanga harsatna hmun 33-ah

August ni 28, Nilaini kha Mizoram tan ni duhawm lo tak a ni; hmun hrang hrangah lei a min a, mipui a tibuai hle. Hriat theih chinah hmun 33-ah khuarel chhiatna vanga harsatna a thleng.Disaster Management & Rehabilitation department-in an chhinchhiah danin, August ni 28-ah hian hmun 33-ah leimin leh a kaihhnawih vanga harsatna a thleng a, a tam ber chu Aizawl district-a mi a ni.
An chhinchhiah danin, Aizawl district-ah hmun 16-ah khuarel chhiatna vanga harsatna hi a thleng a,Ssabereka khuangkaih leh leimin a ni. Lunglei district-ah hmun ngaah, Kolasib district-ah hmun hnihah, Serchhip district-ah hmun hnihah, Lawngtlai district-ah hmun khatah, Mamit district-ah hmun thumah, Khawzawl district-ah hmun khatah, Hnahthial district-ah hmun thumah lei hi a min.
Leimin nasat berna Aizawl district-a leimin hi Aizawl khawpui chhunga mi vek a ni a, Phunchawngah hmun hnihah niin, pakhat chu Sabereka khuangkaih vang ni bawk mah se leimin tiin a chhiar theih. Phunchawng, Chawnpui, Tanhril , Vaivakawn, Ainawn Veng, Chawlhhmun, Luangmual, Khatla, Ramhlun North, Zonuam, Zarkawt, Bawngkawn leh Durtlang inkar kawngah te leimin leh a kaihhnawih vanga harsatna hi a thleng.
Lunglei district-a mi pawh khawpui chhunga mi vek a ni a, Pukpui, Zohnuai, Zobawk South, Zobawk North, Sazaikawn leh Rahsi Venga mite a ni.
Ni 29-ah leimin hi Aizawlah report a awm leh a, Muanna Vengah nasa vak lova min a awm. Ni 26-ah khan Mamit district-ah lung tla leh leimin a awm a, ni 25-ah Siaha district-ah leimin a awm bawk.
Tun hnaiah Mizoramah ruah a sur nasa a, ruah tui a tam bakah ni tin a sur. Hei hian chhiatna leh harsatna a thlen a, ni 28-ah khan Aizawl leh Mamit khawpuiahte mi engemaw zatin inkalpawh kawngah harsatna an tawk.
State Meteorological Centre-in IMD a\anga khawchin thlirlawkna an dawn tawhah ruah hi la sur chhunzawm tura chhut a ni a, mahse Chawlhni thlenga thlirlawknaah hmun tina sur tura chhut a ni lo.