Wembanyama a langsar

Thawhtan zing khan San Antonio Spurs chuan NBA play-off game khatna an khel a, an khingpui Portland Trail Blazers lakah hnehna an chang nghal. Blazers laka an chak tum hian Spurs player pawimawh Victor Wembanyama chuan play-off a khelh hmasak berah point 35 a thawkchhuak a, a chetha nghal hle. Spurs a chakpui vang chauh ni lovin NBA Award-ah 100% vote a hmuh vangin Wembanyama hi a langsar leh zual sauh.
7ft 4in zeta sanga Viktor Wembanyama hian ‘NBA defensive player of the year’ atan thlan a ni a. He chawimawina dawng tur hian vote thlak zawng zawngin pakhatnaah an thlang vek a, vote hui theih zawng zawng a hui fai vek. Vote thlak zawng zawngin pakhatnaa an thlan vek hi kum 43-ah a thleng leh chauh a, hun rei tak hnua 100% vote hmu leh thei chu Wembanyama ngei mai hi a ni. Kum 22 mi Wembanyama hian NBA-ah season thum chauh a la hmang a. Defensivve player tha berah vawi hnih thlan a ni tawh a. Hetiang chawimawina dwng thei naupang ber a ni nghal bawk a. Spurs legend David Robinson hnu lamah season thum chhunga NBA Defensive player of The Year chawimawina vawi hnih dawng leh thei hmasa ber a ni tel bawk.
Defensive player tha berah lungrual taka thlan Wembanyama hian NBA season kal mekah game tinah point 25 thawkchhuak ziah ang a ni a. Game tinah ball sawhlet vawi vawi 11.5 dawng ziah ang a nih bakah game tinah ball chhuhsak (steal) ziah ang a ni bawk. Mimal taka a chet that bakah San Antonio Spurs hi an chetha viau a, season kal mekah vawi 62 an chak a, vawi 10 tlawm zawkah an tang thung a, NBA-ah season an hman thatber tum a ni hial nghe nghe. Mimal-a a chetthat bakah Spurs an chet that bawk vangin Viktor Wembaynama hian ‘Most Valuable Player’ (MVP) nih theihna hun tha tak a nei tel zui bawk.
Vote tla zwng zawnga pakhatna a luah vek chu Wembanyama chuan a lawm uchuak tak zet tih a sawi a. Chawimawina dawng tura 100% chu chhuansam a tih tak zet thu a sawi bawk. German NBA legend Dirk Nowitzki chuan Wembaynama hi a fak hle a, “ani ang reng reng hi ka la hmu ngai lo,” a ti ve thlawt a. Wembanyama fak turin thu uar luat a awm loh thu a sawi tel hial nghe nghe a ni.
‘NBA Defensive player of the year’ Award dawng tur thlannaah hian champion lai Oklahoma City Thunder player pawimawh Chet Holmgren chuan point 239 hmuin pahnihna a luah a. Holmgren hi mi 76 in pahnihnaah an thlang a. Pathumna luahtu Detroit Piston player pawimawh chu vote thlaktu mi pakua in pahnihnaah an thlang a, point 60 a hmu.
Inkhel chu
Play-off game khatnaah San Antonio Spurs hi Portland Trail Blazers lakah an khel tha viau a, quarter hmasa pathumah chungnung zawk an ni vek. Quarter hnuhnung berah point hnihin hnufual zeuh mah se result a sawi danglam phak tawh lo. Inkhel hmuhnawm takah hian Spurs in point 111-98 in hnehna an chang. Play-off game hnihna hi nilai zing khian khelh zui leh a ni ang.
Thawhtan zinga inkhel dangah Cleveland Cavaliers chuan game khatnaa an lo hneh tawh Toronto Raptors an hneh nawn leh a, series-ah 2-0 in hma an hruai. Round sang zawk lut turin Cavaliers hian vawi hnih chak an la mamawh thung.
Point 115-105 a Toronto raptors an hneh tum hian Cavaliers tan Donovan Mitchell chuan point 30 a thawkchhuak a, hnehna an chan theih nan a thawhhlawk hle. Mitchell bakah hian James Harden chuan point 28 a thawkchhuak a, a chetha thawkhat viau bawk.
Inkhel dangah game hmasa bera tlawm Minnesota Timberwolves in hnehna an chang a, point 19 zeta an hnufual hman laiin an khingpui Denver Nuggets chu point ngain an lehthal thei hram a, point 119-114 a hnehna changin series ah 1-1 a ni chiah a, round sang zawk luh ngei tumin an inel zui nasa hle ngei ang. Inkhel dangah Atlanta Hawks pawhin an khingpui New York Knicks chu harsa takin an lehthal ve bawk a, 107-106 in an chak hram.