West Bengal Governor C.V. Ananda Bose hmeichhe laka chemawi lo tiin puh

West Bengal Raj Bhavan a contract a thawk hmeichhia pakhatin Governor Dr. C.V. Ananda Bose chuan khuaikhem tumin a khawih a tih hnuah Bose chuan hetianga inpuhna hi a thlen belh a la beisei thu a sawi.
Amah puha chu ‘drama awm ang lo’ tia sawiin Bose chuan Trinamool Congress te chu an hming sawi lang si lovin an tih nia ngaih theih turin a sawi a. Amah puhna avang mai maiin ‘eirukna leh tharumthawhna tihtawp a nih theih nana a hnathawh’ a chawlhsan dawn lo tiin a sawi.
Rorel lai Trinamool Congress te chuan an party chuan engmah inhnamhnawihna leh inrawlhna an nei lo tia sawiin contract hnathawkin Governor a puhna chu thleibikna awm hauh lova thudik lailang tura impartial inquiry tih an ngiat thu an sawi thung.
A thusawi Raj Bhavan in a tihchhuahah Bose chuan, “Political forces tena an duh dan dana min puhna nasa tak tak te hi ka hrethiam e. Thil nasa zawk pawh min puhna tur a la awmin ka ring. Mahse, thil pakhat chiang tak mai chu hetianga awm ang lo lutuka drama chan hian eirukna leh tharumthawhna tihtawp tuma ka hmalakna a ti thuanawp dawn lo” tiin a sawi.
‘Rilru chhiatna hlawhchham’ in a tihtheih hnuhnun ber chu character tihchhiatsak tum a ni, tiin Bose chuan sawi bawkin, “Raj Bhavan-ah ngei thil rapthlak tak ruahman a ni” tiin a sawi bawk.
Bose chuan amah puhna chu nuihsawh zuiin nikhat chu kum 1943 Bengal Femine leh ‘1946 Calcutta killigs’ ah pawh khan amah dem a la ni hial ang a ti bawk a. “Chu tak chu he State a polticial forces te chet lak dan dik tak a ni” tiin a sawi.
Governor chuan Bengal-a politcal party thenkhatte atanga a beisei theih tur te hrilh lawk a nih thu a sawi a. “Thlipui tam tak ka dodai tawh a. Min beitu political party te hnenah pawh hei hi thlipui a tling lo tiin ka hrilh a ni. Hei chu thingpui no a thlipui tleh ang lek a ni. Keimah zawk hi thlipui ka ni tih in hriat hunah mak ti suh u. An ralthuam dahna atangin eng hmanrua pawh lo la chhuak vek ula, ka lakah hmang rawh se, ka remti a, ka inpeih e. Ka unaunu leh unaupa dikna leh zahawmna dinchantir turin ka bei zel dawn” tiin a sawi bawk.

TMC ten chhui chian ngiat
TMC leader te chuan Governor Bose puhtu hmeichhia chu police station-ah hruai a ni tiin an sawi a. Police te chuan zirchiangin hma an la mek an ti bawk.
Senior TMC leader leh industry minister Shashi Panja chuan he thilah hian an party-in inhnamhnawihna an nei lo a ti bawk a.
Amah mawi lo taka khuaikhem tumna chu hmeichhia chuan Raj Bhavan chhungah ngei a thleng a, ti hian min barakhaih takzet a, awih pawh a harsa a ni, a ti bawk a.
“Hetianga puhna hi governor lakah a la thleng ngai lo. He thil hian governor dawhkan zahawmna pawh a tihniam a ni. Chuvangin thleibik nei hauh lova chhui chian kan phut a ni” tiin Panja chuan a sawi bawk.
Governor ngei hian Sandeshkhali-ah kalpuiin helai region a hmeichhia ten local TMC leader tena an laka sexual harrassment an kalpui dan a ngaithla a. Tunah amah ngei chu Raj Bhavan-a hnathawkin a puh ve thung a, governor hi an lawng chuannaa chuang ve tho a ni,” tiin Panja chuan a sawi bawk.