White Cane Day

October 15 kha khawvel puma mitdelte tiangvar
hman tan ni ‘White Cane Day’ a ni a. Mizoram Blind Society chuan he ni denchhen hian Zoram mipui chibai bukin, mipui leh a bikin lirthei khalhtute mitdel tiang hawl, khawlaia an hmuh chuan tanpui ngai leh an tiang ken zah sak tur a ni tih hrethar turin an ngen.
Mizoram Blind Society hian White Cane Day’ lo pianchhuah dan sawiin, kum 1921 khan thlalaka eizawng James Biggs chu chetsualna vangin a mit a del a. A mitdel hnu hian khawlaia a chhuah changin tiang var a hawl thin a; a tiang hawl, rawng var a hnawih chhan hi lirthei khalhtute leh kawtthlera veivak midangten amah chu khaw hmu lo, mitdel hriatthiam ngai a ni tih awlsam taka an hriat theih nan a ni.
James Biggs tiang hnawih var hi khawvel hmun dangah pawh an lachhawng ta zel a. America-a mitdel association – The National Federation of the Blind chuan White Cane Day serh turin thuneitute an nawr a. Chu ngenna azarah chuan American Congress Joint Session remtih angin US president LB Johnson chuan kum 1964 atang chuan October 15 hi White Cane Day atan serh turin thupek a chhuah ta a ni.
He ni pual hian Mizoram Blind Society chuan kum 2016 atang khan a bika programme siamin hun an hmang thin a. Kumin hi Pathianni a nih avangin an hmang lo.