Wimbledon 2023 tan a ni

Tennis-a inelna lian Grand Slam pali zinga ngaihhlut hlawh ber Wimbledon chu kum 2023 atan vawiin tlai dar 3:30 atangin khelh tan a ni dawn a. Tennis ngainatuten London an thlir rawn leh thup dawn. Wimbledon 2023 hi Star Sport in Live in an pechhuak dawn a, en harsa lo tura ngaih a ni.
Wimbledon chu
‘The Championship’ an tih mai thin, ‘Wimbledon’ tia kan hriat tlanglawn hi Tennis inelna upa ber a ni a, kum 1877 daih tawh khan inelna neih tan niin, Grand Slam pali zingah Grass Court-a inelna awmchhun a ni. Grand Slam dangte angin Grass chunga inelna a awm tam ve loh av^ngin Wimbledon-ah hian thiam fal bik tan lo chuan chet that a harsa a, hnim chunga che tha turin insiam rem an harsat tlangpui thin.
Wimbledon hi June thla chawhnu lamah khelh tan niin, July thla tir lamah zawh fel thin a ni. He inelna ngaihhlut hlawh takah hian vawi riat champion tawh Roger Federer chu mipa lamah champion ngun ber a ni a, hmeichhe lamah vawi kua champion tawh Martina Navratilova chu champion ngun ber a ni ve thung. Kum 2023-ah hian Novak Djokovic a champion a nih chuan mipa lama champion ngun ber Federer record a nih rual ang a. Djokovic hian Grand Slam-ah vawi 24 champion thei awmchhun Margaret Court chamnpion zat a nihrual bawk ang. Wimbledon-ah hian kum 2022 khan lawmman £35,000,000 sem ral a ni.
Tarlan tawh thin angin inelna lian zual Grand Slam pali zingah rau rau pawh Wimbledon hi ngaihhlut hlawh ber a ni a. Wimbledon-a tel ten hmun dang angin an duh zawng zawng thawmhnaw an inbel ngawt thiang lova, thawmhnaw var vek an inbel thin. Thawmhnaw var veka inthuam hi tunhma atanga chin dan thana an lo neih vang a ni deuh ber.
Wimbledon 2023
Thawhtan tlai dar 3:30 atanga khelh tan tur Wimbledon 2023 hi July ni 16, Pathinni zanah mipa final a khar tur a ni. Mipa lamah Novak Djokovic chu champion lai a ni a. Vawi sarih champion tawh Djokovic hian Pedro Cachin hmachhawnin bul a tan ang a. Hmeichhe lama champion Elena Rybakina chuan ShelbyRogers hmachhawnin bul a tan ve thung ang.
Mipa lamah hian World No. 1 ni chunga inlan tur Carlos Alcaraz-a’n ngaihven a hlawh leh viau dawn a. Alcaraz hi final-ah Novak Djokovic nen an inhmachhawn thei thei a nih chuan final duhthusam a ni ngei ang. Mipa lamah champion tura rinkai zinga mi Daniil Medvedev chu he hmunah hian a la thleng sang ngai lova, fourth round la paltlang lo. Norwegian fourth seed Casper Ruud pawhin he hmunah hian vawi khat chauh hnehna a la chang ve bawk.
Mipa lamah hian tualchhung tlangval, he inelnaa vawi hnih lo champion tawh Andy Murray chuan ngaihven a hlawh tura ngaih a ni bawk. Murray hian inelna hautak hmachhawn tura a inpeih thu a sawi a. Bei phak lova a tla hma a nih erawh chuan Tennis chawlhsan thut thei dinhmunah a ding ve thung a. Hei vang hian Murray hian ngaihven a hlawh leh zual ang a, an hlawh viau tura ngaih a ni. Murray hian Ryan Peniston hmachhawnin bul a tan ang.