Earphone-in beng ti chhet thei

Earphone emaw headphone emaw hmanga rimawi kan ngaihthlak hian kan beng tan jet engine thawm tluk zeta ring a ni thei a, chu chuan nerve cell khuhtu a tichhe thei a, kan beng a chhet phah thei niin University of Leichester-a mithiam ten an sawi.
Thil ri 110 decibles (decible chu thil ri rin zawng tehna a ni) aia ring zawk chuan ri hriatna lama harsatna min siam sak thei a, chubakah tinnitus (beng kawrawng chhunga ri deuh veng veng) te pawh a thlen thei niin an sawi.
Kan beng atanga thluaka electrical signal kengtu nerve cell chu myelin sheath an tih maiin a intuam a, chu chuan electrical signal te chu cell-ah a kal tlang tir ta thin a ni. Thil ri bengchheng lutuk, 110 decibels aia bengchhen chuan nerve cell tuamtu chu ti thlerin, electrical signal chu a tibuai ta thin a ni. Chumi awmzia chu nerve ten beng atangin thluakah information an thawn tha thei ta lo tihna a ni.
Mahse, nerve cell tuamtu chu a insiamtha leh thei a, a pangngai angin hna a thawk leh thei. Chuti a nih chuan kan bengchhet chu temporary tihna a ni a, ngai kan awh leh thei tihna a ni. Khawiah emaw hmun bengchheng deuha i awm changin i beng a chhet mup a, mahse, a hnuah ama tawka a veng leh duak thin te hi hetiang deuha kan awm vang hi a lo ni thin. Mahse, vanduai palh hlauh chuan beng chhet hlenna a thlen ve thei tho lawi si a ni.
He zirchiannaa an hotu Dr Martine Hamann, University of Leichester-a Department of Cell Physiology and Pharmacology ami chuan, “Nerve cell chu ama tawkin a insiamtha ve leh thei a, mahse, thenkhat chhe hlen ta a awm thei a, chu chu a pawi hle a ni. Hetiang vanga beng a chhiat chuan beng chhungah ri deuh veng veng emaw kiu veng veng te a siam thei a ni,” a ti.
He zirchianna chungchang hi Proceedings of the National Academy of Sciences-ah tarlan a ni.