Wimbledon-a inhnukdawk Sabalenka leh Azarenka

Thawhtannia Wimbledon round hmasaber an khelh tan hma lawk khan Grand Slam champion ni tawh pahnih third seed Aryna Sabalenka leh 16th seed Victoria Azarenka-te chu dar hliam avang ve vein women’s draw atangin an inhnukdawk.
American Emina Bektas nena inkhel tura tihfel vek tawh Belarusian Sabalenka a theih leh tak loh avangin a aiah Bektas hmachhawn tur hian Russian Erika Andreeva dahluh chawpchilh a ni a; Belarusian ve bawk Azarenka thung hi Sloane Stephens nena insu tur an nih laiin Frenchwoman Elsa Jacquemot chuan a hmunruak hi a luah ta a ni.
Hnung na avanga kumina talbuai Sabalenka hi French Open khelh lai pawh khan quarter-final match-a rawlthar kum 17 mi Mirra Andreeva a hneh loh tumin damlohnain a lo tlakbuak tawh a; thla hmasa Berlin Open khelh laiin a dar a tina leh a; karliamta Inrinni khan Australian Open champion hian kum khat chhunga Grand Slam tournament pathumna khel turin a inpeihchhuak zan lo tih a sawi a, Thawhtanniah London tournament lian atanga a inhnuhdawh thu hriat tur a awm zui ta a ni.
Kum 26 mi Sabalenka hian nikum khan Australian Open-ah a Grand Slam title hmasaber hlawhchhuakin, kha mi hnu khan major tournament-ah player ngialnghet ber pawl a ni chho ta a ni.
Nikum khan Roland Garros leh Wimbledon-ah semi-final thlengin, US Open final a lut a, kuminah a Melbourne title a humhim leh bawk.
Kum 2012 and 2013-a Australian Open title latu Azarenka bakah Russian 22nd seed Ekaterina Alexandrova pawh inhnukdawk zingah an tel a; Alexandrova hi first round-a Emma Raducanu hmachhawn tur a ni nghe nghe.