Wimbledon champion hlui Halep chawl ve ta
Wimbledon champion hlui Halep chawl ve ta
2019 Wimbledon final-a Serena Williams hnehtu Simona Halep chuan Transylvania Open first-round match pakhata 6-1 6-1-a Lucia Bronzetti a hneh loh hnuah Thawhlehni khan tennis inelna a bansan thu a puang ve ta nge nge.
Kum 33 mi Romanian hian Grand Slam singles title pahnih la hmanin, world number one-te pawh a lo ni ve tawh a, tunhnaiah professional tennis chawlhsan a tum ve tawh thu a lo sawichhuak tawh a; thla hmasa mai pawh khan khup hliam avangin Australian Open qualifying atangin a inhnukdawk a ni.
Damdawi enfiahna chungchanga dan a bawhchhiat avangin kum hnih dawn tennis inelna hmachhawn thei loa hrem a nih hnuin WTA Tour-ah a kirleh a, tunkar Transylvania Open-a a inlan kha hremna a tawh hnua tournament vawinga a hmachhawnna chauh la niin, first round-a a tlak rualin mipui hmaah a chawlh thu a puang zui ta a ni.
Hnukulh teuh chungin Halep chuan, “Ka thlarau zawng zawng khawrhchhuak vek chungin thutlukna ka siam a; ka hun liamtate kha an va hlu em. World number one ka ni a, Grand Slam-ah vawihnih ka champion a kha’ngte kha ka thinlung duhzawngte a ni a, mahse, hringnun hi a kal zel tur a ni a tennis piahlamah hian hringnun a la awm si a ni,” a ti.
Halep hian kum 2018 khan French Open-ah a major title hmasa zawk lain, final-ah Sloane Stephens a hneh a; kha mi hma khan Grand Slam final vawithumah a lo tlawm tawh a ni.
Tarlan tawh angin, kum 2019 khan Wimbledon-ah mihang player ropui Serena hnehin a champion leh a; kha mi tum khan a khel ropui takzet a, unforced error pawh vawithum chiah a nei!
A career-ah WTA Tour title dang 22 la tling bawkin, world number one a nih chhung belhkhawm kha chawlhkar 64 a ni bawk.
August 2022-a damdawi hman phal loh a hmang tih an hmuhchhuah hnu khan doping dan bawhchhiat vawihnihah Halep hi kum li chhung tennis inelna hmachhawn thei loa hrem a ni.
A chunga hremna tla chu nikum khan sports thuchhe remna sang ber Court of Arbitration for Sport-ah khingletin, hremna chu thla kaw chhung atan tihhniam a ni ta zawk a.
Kum 2024 March thla khan WTA Tour-ah kirlehin, khami hnu khan kumin thleng hian match ruk a khelh tawhah vawikhat chiah a la chak zo!