Wimbledon hnua Djokovic inlan vawi 1-na

Wimbledon hnua Djokovic inlan vawi 1-na
2021 US Open final hnu lama United States leilunga inlan leh ngai ta lo Novak Djokovic chuan Nilaini khan harsatna leh rilru khingbai nei loin America leilungah tour-nament a khel leh thei ta a, kumin Wimbledon final-a a chak loh hnua competitive match a khelh leh vawikhatnaah a tumpui Alejandro Davi-dovich Fokina inhnuh-dawh avangin a beisei aia awlsam daihin Cincinnati Open third round a lut.
Spaniard Fokina hian 4-6-a set khatna a hloh zet hnuah kirleh tuma a insanmar laiin a hnung-zang hnuai lam a tina a, medical timeout koin han inenkawl ngial mah se a harsatna tawh chuan a kiansan mai thei lo a, a inhnukdawk zui ta a ni.
Grand slam singles title 23 la tling tawh Serb Djokovic hi Covid-19 hripui laka invenna la duh lo langsar berte zinga mi niin, a vaccine hnawl avang khan nikumah United States luh phalsak a ni lo a, 2022 US Open a khel thei lo a, kuminah erawh US leilung luh phalsak a ni leh ta a, New York khaw grand slam tournament khel turin inbuatsaihna pawh a kalpui leh thei ta a ni.
Mipate zinga grans slam singles title la hnem ber Djokovic hian mipa leh hmeichhia thliar loa Grand Slam singles title 24 la tling awmchhun Margaret Court-i all-time record tluk turin kumin Wimbledon-ah khan hun tha a nei a, mahse, final-ah rinkai lo zawk Carlos Alcaraz a ngam lo a, US Open-ah a beisei zui leh dawn a ni.
Cincinnati Open kal laia Djokovic-a tum leh tur hi tunhnaia rawn arh chho leh mek Gael Monfils niin, Nilaini inkhel dangah French player hian straight sets-in Alex de Minaur a hneh.
Mipa singles second round inkhel dangah Serbian qualifier Dusan Lajovic chuan rinkai zawk world number six, Toronto champion leh Italian eighth seed ni bawk Jannik Sinner laka 6-4, 7-6(4) hnehna changin third round a lut.
66th-ranked Lajovic hian kumin chhungin top-10 player pali a hneh tling ta a, 6-4, 7-6(1)-a Italy player Lorenzo Sonego hnehtu American Taylor Fritz a tum leh ang.
He US tournament liana champion tawh leh third seed ni chunga inlan Daniil Medvedev pawhin Italy player Lorenzo Mu-setti laka 6-3, 6-2 hneh-na changin, last 16 lam-ah Germany star Alex-ander Zverev a hma-chhawn leh dawn a ni.
Kum 2019 champion Medvedev hian Cinci-nnati a lak kum khan US Open final a lut a, kumin hian kum li kaltaa a hun tawn ang kha a beisei leh mek a ni.
Round of 16 luh inchuhah Zverev chuan 7-5 6-4-a Japanese Yo-shihito Nishioka hnehin, Greek fourth seed Ste-fanos Tsitsipas leh Ame-rican ninth seed Taylor Fritz pawh round sang zawk lut zingah an tel.
Australian Open finalist Tsitsipas hian American Blake Shelton laka 7-6(3), 7-6(2) hneh-na changin third round a lut a, Poland mi Hubert Hurkacz a tum leh ang. Second round inkhel dangah Hurkacz hian Croatian defending champion Borna Coric a hneh ve bawk.
Chak lo langsar zing-ah Norwegian fifth seed Casper Ruud telin, nikum US Open finalist Ruud hian Australian Max Purcell a hneh lo.
Veteran Swiss Stan Wawrinka pawh khawng zawkin US leilungah a inlan a, American 16th seed Frances Tiafoe laka 6-3, 6-4 hnehna a sualchhuah kawngah ace vawi 11 hlapchhuakin, kumina vawi 27 a chakna a ni tawh.
Kum 38 mi three-time Grand Slam champion hian round of 16 luh inchuh match-ah third seed Ruud barakhaihtu Australian Max Purcell a tum leh ang.