Women’s reservation bill pawm fel ta

Women’s reservation Bill chu Parliament a putluh a nih hnu kum 27-naah September 20 khan lungrual tak deuh thawin Constitution siamthat ngai remtiin, Lok Sabha leh State Assembly-a hmeichhiate tana seat hmun thuma thena hmun khat hauhna tur chu pawm fel a ni ta.
Bill hi Rajya Sabha-ah pawmpui tura thawn niin pawmpui mai a nih rin a ni bawk a, Special Session chhunga pawm fel vek hman a nih rin niin State zahve tena an pawmpui erawh la ngai thei a ni thung.
Politics-ah hmeichhiate tam zawk an inhnamhnawih theihna tur chhinchhiahtlak tia sawiin Prime Minister Narendra Modi chuan Lok Sabha member-te hnenah lawmthu a sawi a ni.
Lok Sabha-ah Constitution (One Hundred and Twenty Eighth) Bill 2023 hi member 454 in an thlawp a. A tlang theih nana member awmte atanga hmun thuma thena hmun hnihin an pawm ngei a ngaihna chu awlsam takin a paltlang a. Member pahnih All India Majlis-E-Ittehadul Muslimeen MP Asaduddin Owaisi leh Syed Imtiyaz Jaleel te chauhin an thlawp lo a ni.
Paper slip hmangin member ten vote an thlak a, vote thlak a nih hma in darkar riat lai sawihona neih niin, Congress-te leh BJP te chu he bill-ah hian hmingthat lak zawk tumin an inhnial nasa hle a ni.
Congress-te chuan other backward classes (OBCs) te tana quota dang siam ni se tiin an ngiat bawk a. Home Minister Amit Shah chuan House hnenah sorkar chuan a fel lo lai a siam that zel tur thu a sawi bawk.
Sawihona neihah Congress leader Sonia Gandhi chuan quota chhungah OBC-te tana quota siam leh ni se tiin a ngen a. Bill chu delimitation exercise kum 2026 thlenga frozen nena kaihpawlh lova tuna kalpui nghal ni se a ti bawk.
“Congress chuan he Bill hi kalpui nghal kan ngiat a. Chutihrual chuan SC, ST leh OBC hmeichhiate tan provision siam kan phut bawk a ni” tiin a sawi.
Home Minister chuan reservation kalpui chu delimitation zawh hnuah chauh kalpui ni se an tihna chhan sawifiahin, Delimitation Commission chu quasi-judicial body a nih avangin public consultation neih hnua reserve seat kalpui dan turah thutlukna an siam phawt a ngai tiin a sawi.
Rorel laiin seat reserve tur kalpui ngawt ila, Congress leader Rahul Gandhi-a Wayanad seat emaw AIMIM leader Owaisi-a Hyderabad seat emaw reserve seat-ah dah ngawt ila, sorkar chu ‘political reservation’ kalpui tiin min puh mai ang a ti bawk.
Lok Sabha-a sawihona neihah hian darkar riat dawn hun hman niin MP 60-in thusawina neiin an zinga 27 chu hmeichhia an ni.