WORLD BANK KAWNG-1999 VS NHIDCL KAWNG-2015

Ruatfela Nu
He article hi nikum lama tihchhuah tawh a ni a, mi tam takin hmasawnna a awm chuan environment in a tuar a ngai a lawm tih ngaihdan an nei leh, kan lui tui in tlak loh khawpa nu, khawl pawhin a tihthianghlim theih loh vanga pump theih a nih loh a, mipuia tui sem a khaihlak pawha thil nihna dik tak, kawng laitu ten, ram dan ding lai zawng zawng bawhchiaa an kawng laih vung kawng thlang lama an nawr liam vek vang tih an hre phak lo a, furah chuan lui a nu vek thin titu chhan nana kan han chhuah nawn leh a ni.
A khuh hawnna:
Kan hmuh leh hriat theuh angin National Highways & Infrastructure Development Corporation Limited (NHIDCL) kawng laihna hmun zawng zawnga kan environment an tihchhiat nasatzia chu namen a ni lo a. Heng an kawng laihna hmuna lui lian fintu luite awm zawng zawng chu 100 % in a chhilh chhe vek a. Luipui hi luitein a fin vanga luipui lo ni ta a ni a. NHIDCL-in an kawng laih vung, kawr leh luitea an paih chu ruah a surin chirhdiakah a chang a, chu chu kan luipuiah a luang lut dul dul a, chung luipui ringa nung, nungcha leh mihring ten chuan tui thianghlim in tur kan tlakchham phah ta a ni.
World Bank kawng Mualpui to Lunglei-1999:
Kum 1999-a detailed project report (DPR) siam zawh, kum 2000-a laih tan, World Bank sum hmanga Mualpui to Lunglei kawng laih a nih khan, tihfel ngai heng —environmental impact assessment (EIA), environment management plan (EMP) leh resettlement action plan (RAP) te chu tih a ni a, environmental clearance pawh an nei a ni.
EIA tih a nih lai hian hmun pakhatah ramhmul damdawi, hnim vang tak hmuh a nih avangin chu lai kawng chu tih danglam a ni a. (hei hi thup a tul vangin tarlan a rem lo) Hmun dangah ramsa vang tak hmuh a nih avangin environmental clearance tihkhawtlai a ni bawk.
Engati nge kum 1999 daih tawhah, hmasawnna (development) hna lian tham siam/thawh a nih dawna EIA, EMP leh RAP etc. tih nachang an hriat tawh laia climate change, global warming leh water crisis thleng mek vangin khawvel muthlu a thangharh a. India ram judiciary pawh environment lamah 100%-in a tang tawh kan tih laia NHIDCL hian kan Environment zahpahna nei lek loa heti taka a suasam tak ni? A chhanna tlangpui chu-sawrkar/ministry thiamloh a ni a, environment forest & climate change (EF&CC) department inthlahdah vang a ni a, district deputy commissioner ten an tih tur an tih loh vang a ni a, mipuiin kan environment pawimawhna kan hriat tawk loh vang a ni. Heng zawng zawng khaikhawmna chu—Mizo mipui, kawngpuiin a tan tlang ram neitu, a te ber atanga a lian ber thlenga tangka sum ngainatna leh duh huam huamnain min chimpil tak vang a ni.
World Bank kawng laih dawna ram hmangaihtute kha khaw’nge?:
World Bank kawng laih a nih dawn khan mipui hnenah- environment humhalh chungchang leh kawng laitu pawlin a paltlang khuate an tihbuai lohna tura zirtirna leh hrilhhriatna (awareness) a tha em em a, a vil zui (monitor) tu, Mizoram PWD pawh an tang a. MZU mi thiamte an inrawlh a. Law firm zahawm tak taka lawyer thlengin world bank leh an hnuaia contractor te an vil hneh hle a. Kawngpui laih tharin a pal tlang khua ten, an ram chhunga kawng thlanga leivung nawr liam tur an en pui a, danin a phut angin mock disposal plan/spoil bank/dumping area siam a nih avangin kawng thlanga leivung nawr liam a tlem a, Mizo upa ten “buh khawihnaah buh a bua a, tui dehnaah tui a bua” an lo ti mathlawn loin, kawng thlanga leivung tla tawk chu a awm lo thei lo a. Mahse kawr leh lui chhilh khawp an nawr liam lo a ni.
Khang laia huna mahni ram hmangaihtute kha khaw’nge an awm zawh tak le, an thi zo tawh em ni ang? Kum 20 awrh chauh a la liam a, an la thi zo lo ang. A tawi zawngin-NHIDCL kawng laih viltu hi MPWD an ni tawh lo a, district deputy commissioner office-in compensation lam leh dan anga kalpui a ni em tih endik lam an khawih a, Mizoram EF&CC-in environment a nghawng chhiat lam an vil (monitor) thung tur a ni a. Hetiang a nih chuan mawhphurtute an lang ruak a. Tute nge mawhphurhna hlen lo. Eng vangin nge an hlen loh? Pawisa vang a ni lo thei lo.
Harsatna hi Tuirial Hydel Project Compensation atanga intan a ni mai thei?:
Mai thei mai phei chu a ni a: kum 22 kal tawha Mizo mipuiin Mualpui to Lunglei kawng laiha kan ram leilung leh a chhunga cheng mihringte thatna tur duha kawng lai pawl kan vil ang khan, engati nge 2018 hian NHIDCL kawng laih hi kan vil loh? Kan ram hi kan hmangaih ta lo em ni? Kawng lai pawlin kan environment ti chhe vek mahse pawi kan ti ta lo em ni? Engati nge? Eng vang nge?
A chhan ber nia ka hriat taka chu- khulai Tuirial phairuama ram nei ngai reng reng lo ten dik lo taka compensation an ruh tak tawk tawk atang khan, Mizo mipui nawlpui hian awlsam taka compensation lak tawk tawk lamah kan rilru a lo piangsual ta a. Chulai khalai hmunah chutiang khatiang hmasawnna (development) hna thawh a ni dawn tih hriat a nih atangin, mi rethei zawk ram lei sak tum an intlansiak suau suau a, thenkhatin VC pass leh periodic pata an siam chawp a, thenkhatin dan awmsa her danglam hial an tum thul.
Tuirial hydel project compensation, awlsam taka tangka sum siam ang kha, a tha lo tih hre reng chunga duh ve, awt ve, zawng ve, ti ve an rawn chhuak hum hum a, kha mi atang khan kan rilru a piangsual zo a. Mahni kut thawhrim rah ni loa “compensation la duh hnam” kan lo ni ta a ni. Ni lawm ni?
Ram hmasawnna hna thawhin mimal in leh lo, huan lo ram a tihchhiat sakte chuan compensation hi la rawh se, an phu a, an phu vangin zangnadawmna pawh siam a ni. Mahni in leh lo, huan lo ram eizawnna chan hi a na a, an chan hu an hmu ngei tur pawh a ni. Mahse zangna ve lo puiin zangna an insiam chawp a, hausakpui tuma an huamhap em em hi a rapthlak a, a runthlak takzet a, mihring rilru ti piangsualtu a ni si.
Tichuan, world bank kawng laih laia kan environment kan humhalh anga tuna NHIDCL te kawng laiha mipui pawl (community) hrang hrang, ram hruaitu, kawngin a paltlanga ram neitu, ukil leh mawhphurtu sawrkar department-te tangka sumin kan rilru a tihchhiat tak vangah ka ngai a ni. Heng zawng zawng hi environment hum turin an pawimawh vek. Zangnadawmna la thei chin leh zangna ve lo puia zangnat tum talhte tluk thoin, zangnadawnna hi ukilte pawhin tangka sum hai luih nana hmangin an hlawkpui a. Sawrkar/ministry leh a concern department ami ten an hmang bawk a. Ram neitu ten NHIDCL ah lei vung paih nan an ram an hralh a, an ram chinah an ram baka kawng laih vung liam tur danna an siam chuang bawk si lo a. Kan ram leilung tlakin a zirloh avangin kawr leh lui a hnawh vek tho a. Kan chhe ta vek a nih hi.
Pathian thuin “Tangka sum ngainatna hi sual tinreng bul a ni a. Chu mia buma awmte chu an fing lo a ni” a tih angin World bank kawng laih laia mahni ram leilung leh a chhunga khuarel mawina (nature) awm humhim tura kan tanrual ang khan tangka sum ngainatna, a duha duh huamna vangin kan tang ta lo a. Kan environment a chhe zo ta a ni. Kawng lai pawl chuan an lai zo ang a, an haw ang a, kum li vel an vil zui ang a, kan environment erawh chuan ngaiawh leh tur chuan kum 20 a duh ang. Hawh teh u, world bank kawng laih laia kan tanrual ang tho khan i tangrual leh hram ang u.