World Cup 2026-ah inkhel 104

World Cup 2026-ah inkhel 104
Khawvela football thuneitu sang ber International Federation of Association Football (FIFA) chuan Rwanda-ah rorel inhmuh-khawm an nei mek a. Fifa meeting hian World Cup 2026 khelh dan tur chung-changah thutlukna an siam fel thei tep niin tarlan a ni.
USA, Canada leh Mexico te inthlen tawm tur World Cup 2026-ah hian ram 48 an inel tawh dawn a. Heng ram 48 te hi group hrang hrang 16-ah thenin, group tina a sang pahnih zelin last 32 lut turin rawtna a awm. Group khatah ram pathum zel an awm a, a ti tha pahnihte tlang tur an nih bawk si chuan tlang tur a chiang hma bik dawn a. Group stage-a inkhel hnuhnung ber boruak a hniamin, ngaihven a hlawh loh viau ang tih hlauhthawnna lian tak a awm. Kum 1982 World Cup ah khan group khatah ram pathum an lo awm tawh a. Hemi tum pawh hian group stage game hnuhnung ber hian ngaihven a lo hlawh lo viau tawh.
World Cup khel tur ram 48 te group 16-ah then a, group khatah ram pathum zel awm tur ang rawtna awm hian thlawp a hlawh loh vangin ngaihtuahna sen thar leh a ni a. World Cup hnuhnung berah khan group stage-a game hnuhnung berin ngaihven a lo hlawh em em hlawm bawk nen group khata ram pali zel awm hi duhna lian tak a piang thar leh. Group then hran dan tur chungchang hi Fifa meeting ngaihtuah zingah ngaihven hlawh zual zinga mi a ni a. Group 12-ah ram pali zela then hran an awn ta niin tarlan a ni.
Ram 48 te hi group 12-ah team li zela then hran an nih chuan group khata a sang pahnihin direct in last 32 an lut ang a. Group hrang hranga pathumna ni zinga titha zual pariat ten last 32 an lut ve leh thei dawn bawk. Group 12-ah team li zela an inthen a nih chuan ni 39 chhungin game 104 khelh a ni ang.