World Cup-a duhsak bik hlawh Argentina?!

World Cup-a duhsak bik hlawh Argentina?!
World Cup-a sawi hlawh tak pakhat ni chho ta deuh reng chu player malkhaia inkhel entu pawtchhuak hnem thei bera ngaih Lionel Messi telna Argentina team-in Fifa leh an hnuaia official-te duhsakna an hlawh bik nia ngaihna reh hlei thei lo hi a ni!
Kumin World Cup kal mekah pawh chu thu bawk chu a vung leh vut vut tawh a, Argentina-in World Cup title an kawl lai humhim tura an theihna zawng zawng an sawrkhawm lai hian mual letliamah duhsak bi an hlawh nia puhna an phur tel pah ve reng a, last 16 inkhel pakhata Egypt an hnehna inkhelah khan chu ngaihdan chu nasa zawkin a rawn chhuak leh ta a ni.
Fifa tournament-a an kalkawng, a ler lam tak tak tih loha world top 10 chin an pumpelh theih dan, card an hmuh tlem bik dan, penalty an hlawhchhuah theih dan leh ni thei awm hrang hrang an ngaihtuahin mi tam takin Artgentina hi Fifa-in tournament tihlutu atan leh ticket leitu tam zawk an neih reng theihna atan tournament hmawrbawk ni thlengin inhamtang se tih an duh niin an ngai thin a, result tharlam tarchhuah tur awm loh karlakah chu mi chungchang chu i han thlirho mai mai teh ang.
World number two lai nih manah Fifa ranking-a top 10 luah ve dangte ang bawkin tun World Cup kal mekah pawh round tawp lam tih lohah chuan an tiatpui tumna ‘chance’ pek an ni lo.
Knock out round hmasa pahniha an hmachhawn Cape Verde (67th in the world) leh Egypt (29th)-te pawh kha top 10 pawn lam vang vang an ni a, defending champion meuh tan chuan nuamsa pangngai taka chak tura beisei an nih laiin 3-2 hnehna ve ve nen harsa takin quarter-final an lut hram a; Pharoahs an hnehna inkhel phei chuan sawisep a kai zui hle nghe nghe a nih kha!
Hun tawp hma minute 11 chauh awm tawh thlenga hma an hruai hnua an tlawm zui tak mai danah Egyptian Football Association lungawi loin Fifa hnenah last-16 match an khelh tuma an inkhel hamtu French referee Francois Letexier leh kha mi tuma officiating team zawng zawngte lakah official complaint an thehlut a, tournament kal lai atanga hawtir tur leh eng match mah vil zui tawh lo tura an duhna an thlen.
Egypt FA chuan last 16 game-ah khan official-te chu Argentina leh an star player Lionel Messi-te chu duhsakna uchuak dawng bikah an puh a, inkhelh bana an coach Hossam Hassan-a lungawi lo chuan a team-te kha fair lo taka ham tlak an nih thu leh dik lo taka ro relsak an nih thu press conference-ah a sawi chhuak a, an khaw lama a haw hunah pawh tun tournament inkhel hmabak la awmte chu en a tum loh thu a sawi hial nghe nghe.
Hassan hian Fifa pawh na taka beiin, an bias hle niin a ngai a, “He tournament kal laiah hian world champion hi la tla rih lo se an duh niin a lang a, Messi pawh la hmuh zel rih an duh a ni mai thei,” a ti!
Argentina hi a tawp thleng dam a, champion leh ngei turin Fifa hian an duh a, chu mi tur chuan ruahmanna an siam ru reng em tih hi zawhna lian tak a ni!
Kan hmuh ang khan, African team khan history thar ziakin an ram chanchina a vawi khatna atan World Cup quarter-final an lut ve ngei dawna ngaihna a pian hman hial hnuah Argentina erlet ropui lutuk hmuh tur awmin, minute 11 chiah awm tawha si hnih faia la hnufual zawk chungin 3-2 hnehna nen Aigupta mipui tah tlawk tlawkna an thlen a, match official-te leh Fifa-in puhchhiatna lianpui an tawk zui ta a ni.
Egypt lungawi thei lo chuan referee tihsual pawi tham zet a thlen thu sawiin, French referee Francois Letexier leh a team-te kha lehlam pawl chak theihna atana duhsakna uchuak lantirah an puh!
Pharaohs lawm lohna chhan bulpui chu goal an thun fel diam tawh hnua video assistant referee (VAR) inrawlh vanga an goal hnihna hnawlsak an ni leh chuti ang deuh chiah thil thlenga Argentina chakna goal endik a ni ve leh si lo lai leh an penalty hlawhchhuah tur ngei ngei nia an ngaih hamsak an ni ve ta lo kha a ni.
Mostafa Zico goal pui tak intanna ball inchuh laiin Egypt goal bulah Marwan Attia chuan Lisandro Martinez-a ke a rah avangin chu mi atanga ball chhuak kal zelin goal a hrinchhuah chu endik a ni a, Attia foul avangin si hnih faia Egypt hmahruaina tur goal chu chhuhsak an ni!
Kha thil thleng kha sawi buai theih (controversial) chu ni ngei bawk mah se minute kua a liam leh tihah African-ho khan an goal hnihna an thun zui leh tho a, Zico goal hmasa kha pawmsak pawh ni se inkhel result a danglam phah ngei dawn em tih sawi theih a ni lo!
Hun pekbelh minute hnihna a kal mek laia Enzo Fernandez-a chakna goal tauhluh hma khan Egypt lam chuan tum hnih penalty an ngiat hlawhchham a; a hmasa zawk chu Hamdi Fathy laka Alexis Mac Allister-a foul niin, kha thil kha foul a ni ngei em tih replay lamah pawh a chiang chiah lo a; a dang leh chu Julian Alvarez-a kein Mohamed Salah ke a dang nia a lan avanga Liverpool striker hlui tlu kha a ni.
Egypt goal hnawl a nih chhan Martinez-a ke rahsak a nih dan leh Salah tluk chhan khan inanna a nei ngei mai a, Alvarez-a ke leh Salah ke kha a intawk ngei ni pawhin a lang a, mahse, penalty em han hringchhuak tur hmel erawh a pu chiah lo niin a ngaih theih!
A nih loh pawhin Salah tlukna kha penalty area pawn lam tal ni se VAR lam pawhin referee hnena foul rawn hriattir kha a inthlahrunawm nep deuh ang a, Egypt tan an tlawmna goal hnukirlehna chance a sang zawk mai thei!
Alvarez-a foul ham a nih chuan penalty a chawi a ngaih bakah Argentina goal pawm loh a ngai dawn a, kha em em kha chu match official-te tan thutlukna lian lutuk a ni thei dawn a, foul dan lah kha ‘soft’ deuhin a lang bawk nen an thlirliam ta mai niin a lang a; kha tak kha Fifa thupeka match official-te lamin tournament kal laia Argentina duhsak tura an hrilhrukna rah chhuah niah an ngai ve bawk!
Salah laka foul pawh kha Martinez laka Attia foul ang thoa inhnial theih ni bawk mah se Messi an duhsak bikzia nemnghehna ang em chuan pawm a harsa deuh mai thei!
Argentina duhsakna tuartu dang France?!
Result tarlan hman lohah nizan khan France leh Morocco-in quarter-final hmasaber khelin, kha match-a inkhel viltu official team pumpui kha Argentina lam mi vek an ni a, he thu buatsaih lai hian thil thleng a awm em tarlan hman a ni lo!
Kum 2022 World Cup final-a Argentina laka vanduai France kha nizan result hre hman lo mah ila semi-final lut ngei tura ngaih, kuminah pawh champion tura rinkai niin, final-a Argentina laka phuba la thei tura ngaih an nih mek laia Les Bleus last 8 match vil tura Fifa lamin Argentine official hlang an thurchhuak leh nalh khan mak tih a hlawh leh hle!
A mak lehzualna chu nizan kha tun World Cup kal meka on-field officiating team pumpui – referee, assistant pahnih, fourth official leh reserve zawng zawng ram khat an nih vekna awmchhun a ni a, chu’ng mite ram chu Argentina!
Nizana inkhel hamtu Argentine football referee Facundo Tello ‘appointment’ hmuh tawh dang pahnih chu Saudi Arabia game-a fourth official a nih leh Colombia match-a reserve-a an dah kha niin, nizan zet chu Argentina hmelma lian ber ni tura ngaih France game-ah a referee ta luah a ni!
Argentina hian final match-a France pumpelh hi an chak hlein a rinawm a, Mbappe leh a thiante dam chhung chuan tournament favourite an nihna hi a chiang tak tak thei lo!
Tun hi a zawna World Cup quarter-final a ham tum hnihna niin, nizan kha Tello career-a inkhel lianberte zinga pakhat a ni a, chuti ang referee dahsan chin tan mahni zahawmna hlipa ham fair loh viau chu thil tih chi a ni lo ang!
Engpawhnise, tun ang boruaka France inkhel vil tura Fifa lamin Argentine official hlang an ruat hrim hrim kha a mak dangdai ve reng reng!
Hrem pumpelh thei Messi!
Argentina captain Lionel Messi inkhel lai hi mi zawng zawng en chak, a tel tawhna inkhelah reng reng ticket an hralh ruih ruihna mihring kha a ni bawk a, Fifa pawhin a lakah duhsakna uchuak a lantir nia ngai pawl an tam a, tun tournament-ah pawh red card hmuhna awm takah an haider a, goal khung chhunzawm turin an chhuahzalen tih a ni leh tawh!
Group J match-a Algeria captain Aissa Mandi chawnpuara a rahsak kha red card ni thei tura ngaih a nih laiin yellow card takngial pawh pek a ni lo!
Karliamta mai khan tun World Cup-a thil thleng lian tham hriat tur awmin, Messi chet dan ang deuh chiaha foul United States striker Folarin Balogun chu Bosnia and Herzegovina an hneh loh tuma lehlam pawl player laka a foul avangin VAR review hnuah hnawhchhuah a ni a, mahse, Argentina captain foul an hrem loh nena a inan vang nge a red card chu hnuhdawh niin, Belgium game khel thei tura chhuahzalen a ni!
Balogun an hnawhchhuahna ang bawka foul ve tho Messi kha red card nena hnawhbo chu ni ve se Algeria game-ah khan tournament kai laia a goal hnihna leh thumna a thun dawn loh bakah Austria lakah khan goal hnih a khung dawn lo a, goal a tihluh lehna Jordan laka Argentina final group game thlenga hrem zui theih dinhmuna a din laiin a damkhawchhuak leh lel!
Chuti a nih chuan World Cup kal meka goal riat a khawl tawh zinga goal nga lai chu phumbo a ni dawn a, top scorer inumna kal mekah a hming a lang pha hlek lo ang!
He red card pumpelh atang ngawt pawh hian Messi laka enkawlna tha bik an pek dan chu a fiah thei mai kan ti em?!
Referee-te ngaihdam hlawh thei Argentina!
Messi mai bakah Argentina player dangte pawh hi yellow card laka him thei tak niin an sawi!
Tun quarter-final kal mekah hian player 17 lai chu yellow card hmuh leh ruala semi-final khel thei lo tur, fimkhur em em ngai an ni a, chu’ng mite zingah chuan Argentina player chu pakhat chiah a han tel leh bik a! Chu chu Gonzalo Montiel niin, Switzerland an sut huna yellow card a hmuh chuan last-four lama England or Norway an tum hunah a inkhel thei lo ang.
England coach Thomas Tuchel chuan chuti ang dinhmun him loa ding mek player pali hrilh uluk ngai a nei a, an zingah hian a player pawimawh pahnih Jude Bellingham leh Declan Rice an tel nghe nghe.
Khawvel mihring zinga nungchang mawi leh mi ti thawt thawt loa sawi ram Norway pawhin Antonio Nusa chiah yellow card hmuh rem lo zual an nei.
Argentina hi foul vawi 19.7 zela yellow card vawi khat hmu anga chhut (yellow-to-fouls ratio) niin, an ni aia yellow-to-fouls ratio nei sang awmchhun chu Czech Republic (37.0), Norway (24.0) leh Tunisia (27.0)-te chauh an ni.
He thu buatsaih lai thlenga team la dam zingah England chu yellow card hmu thei ber niin, foul vawi 7.7 zela yellow card vawi khat zel hmu zat zat anga chhut an ni.
Argentina hian tun dinhmunah England ai hian foul an ngah tawh a, chuti chungin Three Lions yellow card hmuh zatve pawh an la hmu lo!
He tehna atang hian foul chunga ngaihdamna dawn theih kawngah pawh Argentina hi Fifa instruction dawngtu match official-te duhsak bikna dawngah kan ngai em? Mahni theuh chhanah dah ila!
World Cup draw lam thlir ila…
A pawha pawh kan ti tho nain nikum December thla World Cup draw kha thlirkir zuai ila.
Fifa world ranking-a a sang pali – France, Argentina, Spain leh England-te kha khung hran thliah thliah niin, group stage an paltlang theih chuan semi-final thlen hma zawnga insu thei lo tura ruahman a ni.
Thlur khata awmdun team lian pahnih France leh Spain chu semi-final lama intm thei tura dah niin, thler lehlamah Argentina leh England chu final luh inchuh thei an ni ve thung.
He idea hi marquee team-te intum hma lohna tura duan a ni.
Chutih reng rualin group stage-a an tawp danin an hmabak a hril zui tho a; knockout round hmasa pahnihah khan world top 10 chin intawng pahnih chiah awmin, chu’ngte chu – Netherlands vs Morocco leh Spain vs Portugal-te an ni.
Tarlan tawh angin, Argentina kalkawng chu nem bikin a lang leh ta tlat a, last 32-ah Cape Verde leh last 16 lamah Egypt! Chu pawh a hnuhnung zawk phei chu sawi hlawh tak chunga chak an ni!
Quarter-final lama an tum leh turte hlei hlei hi champion tum ve ngam chin tana sut phurawm tak tur Switzerland (19th) an la ni lehzel!
England chuan semi-final lama Argentina an tum theih tur bak a hma zawngin top 10 chin an su dawn lo a; Azteca khelmual harsaah team khawng leh a thlengtu pakhat ni bawk Mexico (14th) nen an inchai ngial tawh thung!
Spain kalkawng a hautak ta deuh thung a, Portugal (5th) an paltlang hnuah zanin hian Belgium (9th) an su leh dawn a; nizan quarter-final result tarlan hman lohah France-in Morocco (7th) an hmachhawn thung.
He stage-a Argentina kalkawng pawh hi a nem leh diai bik tlat a ni!
Penalty hlawhchhuak thei Argentina!
2022 World Cup trophy an lakna kawngah pawh Argentina kha penalty-in a pui hle tawh a, World Cup-a penalty hlawhchhuah kawngah record thar siam hialin, penalty vawi nga an chhuih hman khan World Cup tournament vawi khata penalty hlawhchhuak thei ber team dinhmunah a hlangkai!
Kumin tournament kal mekah pawh an penalty pumpelhin sawi a hlawh mek laiin vawi thum an chhuih leh hman der tawh a, chu’ng zinga pahnih chu an captain Messi khan Austria leh Egypt lakah a thun lo nghe nghe.
England leh Switzerland-in tum hnih ve ve hmu ve tawhin, Belgium, France leh Norway-te’n vawi khat diat diat an pet ve tawh bawk.