World Cup khel tur Tunisia

Thawhtan zan khan South Africa khawmual atanga World Cup 2026 khel tur zawnna neih chhunzawm a ni a, si khat faia Equatorial Guinea hnehtu Tunisia chu World Cup khel turin an tling. Tunia laka tlawm Equatorial Guinea tan World Cup khelh phak beiseina tlem a la awm.
Group H-ah tlawm nei lova hmahruai mektu Tunisia hi Equatorial Guinea hmachhawn turin Nuevo Estadio de Malabo-ah an lenglut. Mikhual an nihna hmunah khel tha thawkhat viau mah se goal an thun har hle thung. Inkhel hmuhnawm takah goal lut a awm thei lo reng a, hun pangngaiah chak zawk an awm thei lo. Hun pangngaiah chak zawk an awm theih loh hnuin hun pek belh dawn hnaih lam minute 90+4-ah Tunisia tan Mohamed Ali Ben Romdhane chuan goal pawimawh zet mai a thun. Romdhane goal thun hnu hian goal a luh belh tawh lova, Tunisia hian hnehna pawimawh tak an chang zui ta a ni.
Equatorial Guinea lakah an chak leh tak vangin Tunisia hi World Cup khel turin an tling chiang tawh a. Khelh hnih khelh hmabak la nei bawk mah se Group H-ah an champion chiang tawh. World Cup 2026 khel tur zawnnaah Tunisia hi an khel tha viau a, vawi riat khel tawhin goal an la chhuah miah lo. An khelh that chhoh em vangin awlsam takin an tling zui ta reng bawk.
Tunisia hi khawvela ennawm ropui ber FIFA World Cup-ah vawi riat an inlanna tur chiah a ni. Vawi sarih ngawt World Cup khel lo khel tawh bawk mah se group stage an la paltlang ngai miah lo thung. Canada, USA leh Mexico-a khelh tur World Cup-ah an dai ngai loh ram daiin group stage paltlang ngei an tum hle ngei ang.
Tunisia hi South Africa khawmual atangin World Cup 2026 khel tura tling pahnihna an ni a, Morocco hnung an zui. Algeria in World khelh phak an hnaih viau tawh a, thawhleh zana an khingpui Burkina Faso an hneh a nih chuan Egypt pawh World Cup 2026 khel turin an tling ve bawk ang.