History-a pawimawhna thuk tak nei Ukrainian port city Odesa chu United Nations cultural agency chuan Russia-in a dodal chungin World Heritage site-ah a puang.
-- Advertisement --
Unesco thung chuan thutlukna a siam chhan chu he hmunin ‘universal value hlu tak a neih vang’ tin a sawi thung a. Russia erawhin ‘politics thila inhnamhnawihna’ tel tiin a sawi thung.
Pearl of the Black Sea tia hriat lar bawk Odessa hi Russia in Ukraine a run hnuah tum tam tak bomb hmanga beih a ni a.
Nikum pawh khan Odessa a chengte chuan city monument leh building te chu bomb laka a him nan sandbag tiang vumin humhalh tumin theih tawp an chhuah a ni.
Vote lak a nih zawh hnuah Unesco director general Audrey Azoulay chuan Odesa World Heritage site a puan chu hmalakna pawimawh a ti a.
“He khawpui hi world heritage a ni a, kan zavaiin min huam tel vek a, a history kan hmuin kan pawm vek a ni,” tiin a sawi.
Azoulay chuan thutlukna an siam takah chuan convention member tinte Russia pawh tel vekin World Heritage site tihhmelhem a nih loh nana mawhphurhna nei vek an ni a ti bawk.
Odesa hmun thenkhat chu World Heritage in Danger list ah telh ni bawkin Unesco chuan heng hmun te humhim nan hian technical leh financial assitance a pe dawn a ni.
Ukrainian President Volodymyr Zelensky chuan lawmawm a tih thu sawiin ‘Russian inrun hmang te lak ata kan pearl hum him nana min puihnaah kan lawm’ a ti.
Vote lak tihkhawtlai a nih theih nana theihtawp chhuahtu Russia thung chuan Ukraine chu an thil hlui leh hun hlu te tichhiaah a puh hlauh thung a.
Moscow foreign ministry chuan Ukraine chu application dossier chhe tak thehlutah puhin vote lakna pawh Khawthlang ramte turna hnuaia neih niin dan leh hrai zawm that a ni lo, a ti bawk a.
“Rang leh hmanhmawh taka tih niin Unesco standard sang tak kalpui mek te chu namnul a ni,” tiin Russia foreign ministry chuan a sawi bawk.
Ukraine-a hmun dang pasarih te pawh Unesco World Heritage List ah hian telh thar niin chung zingah chuan capital Kyiv a Saint-Sophia Cathedral leh western city Lviv a historic centre te pawh telh zingah an tel a ni.