Ukraine president chuan khawthlang ram hruaitute chu Russia an beihletnaah an mamawh tank an pek dawn tak avanga lawmthu hrilhin mahse rang taka tank te chu dawn an mamawh thu a sawi.
-- Advertisement --
Volodymyr Zelensky chuan Khawthlang ramte chu long-range missile leh fighter jets te pawh pe tel turin a ngen a.
US leh Germany te chuan Ukraine hnenah hian Abrams leh Leopard tanks te pek an remti fel ta a ni.
Russia chuan haw hle thungin ‘inrunluihna turu’ tia sawiin heng Ukraine hnena tank pekte hi an tihchhiat vek tur thu a sawi thung a.
“Heng tank te hi thil dang ang bawka kangchhe mai tur a ni a. A man a to em em ringawt” tiin President Vladimir Putin thupuangtu chuan a sawi.
Zelensky chuan Nato secretary general Jens Stoltenberg hnenah ‘Defence co-operation kan neihna hrang hrangah pawh hmasawnna a awm a ngai’ tia sawiin Ukraine-in long-range missile leh artillery a mamawh tiin a hrilh bawk.
Western tank te chu rang taka Ukraine pek vat mai bakah tam tham tak ni se a duh thu a sawi a. “Tank force kan din a ngai a, freedom force a ni anga chetlakna a neih hunah inluling te chu an tho leh tawh ngai lovang,” tiin a sawi.
US President Joe Biden chuan US chuan M1 Abrams tank 31 Ukraine hnenah a pek tur thu a sawi a. A hma lawkin Germany chuan Leopard 2 tank 14 a pek tur thu a lo sawi tawh bawk a.
Hei bakah hian Berlin chuan Euroepan ram tena German siam tank te an ta Ukraine hnena an pek duha an pek theihna turin remtihna a pe bawk a. Ukraine hian Western ram te hi a thla a thla tank pe turin a lo ngen tawh a ni.
Heng tank hmangte hian Ukraine chuan Moscow-in a chhuhsaka a luah mek a territory te chu a lak let leh theih ngei a ring a. Hei bakah hian thal a thlen hunah Russia-in nasa zawka a beih pawhin do let tha thei turin a awm phah thei dawn, a ti bawk.
US President Joe Biden chuan, “Putin hian Europe leh United States te chu kan tumruhna te a tihnep theih a inring a,” tia sawiin, “A tir phat atangin a hre dik lo va, a la hre dik lo zui zel a ni,” tiin a sawi bawk a.
“Ukraine hnenah hian tank parts leh equipment te pawh indona tualzawla hman chhunzawm zel theih nan kan pe tel ang,” a ti bawk a. “Kan hmalakna hi Ukraine-in an ram a humhim theihna tura puihna a ni a. Russia beihna a ni lo,” tiin a sawi.
Ukrainian tank battalion-ah hian tank 31 zel a awm a, hei vang hian keini pawhin 31 pek phawt kan remti a ni, tiin Biden chuan a sawi bawk.
US hian a hmain rit tak mai M1 Abrams tank chu Ukraine a pek luh harsa leh enkawlna hautak a lo ti tawh a, a rilru a thlak zui ta a ni. He tank hi tunlai khawvela tank tha ber pawl niin operate tur pawhin training neih fe ngai a ni bawk.
US package $400 million zingah hian recovery vehicle tank-te an tan pawha hnukchhuak thei khawpa chak pariat bakah ammunition, equipment leh training leh maintenance tihna tur sum a pe tel bawk a. Mahse, heng tank te hian thla a ral hma chuan Ukraine a thlen hman rin a ni lo thung.
White House national security thupuangtu John Kirby chuan US in Abrams tank chuangliam a nei lo a ti a, private contactor te hnen emaw ram dang atanga a lei leh chhawn a ngai dawn, a ti bawk.
German siam Leopard 2 tank erawh a siamna hmun atanga lak mai theih tur niin mahse thla hnih thum chu a ngai dawn thova ngaih a ni a. He tank hi indona tuala tha ber pawla ngaih a ni.