World No 1 ranking luahkir Sinner

World No 1 ranking luahkir Sinner
Italy star Jannik Sinner chuan tennis big three hun liam hnua hnahthar chawrchhuak fuh fal bik tlemte zinga pakhat a nihna lantir chhunzawm zelin Pahianni final-ah 6-4, 7-6(4)-a a elpui Felix Auger-Aliassime hnehin a career-a a vawi khatna atan Paris Masters title a hlawhchhuak a, ATP ranking lamah pawh number one a luahkir leh ta.
Mipa tennis kum kharna ATP Finals khelh tan zui mai turah pawh rinkai a nihzia a nemnghet.
Italian second seed hian Paris khaw final-a chak kha nimin, Thawhtannia tarchhuah men’s ranking thara a elpui lian ber Carlos Alcaraz hmakhalh theihna hun remchang a ni tih a hai lo a, he tournament history-a set hloh loa trophy chawi thei player palina a ni zui ta hial a ni.
Sinner-a hlawhtlinna kha kumin bika Masters lallukhum a khum vawi khata niin, kumin bika title hrim hrim panga a lak tlinna a ni a, indoor hardcourt bika a zawn zata match 26 a chak tlinna a ni nghal bawk!
Canadian ninth seed Auger-Aliassime tan pawh Paris Masters title lak ngei ngei kha Turin khawpuia season-ending ATP Finals khelh phakna hun remchang a ni a, mahse, tunlai mipa tennis huanga player hlauhawm berte zinga mi Sinner ber kher a hmachhawn a, a tan tihngaihna a awm ngang lo a ni ber!
Auger-Aliassime hian tunkarah Metz title a beisei leh dawn a, hei hi karleh ATP Finals khel pha tura a beiseina hnuhnung ber ni tawhin, first-round a bye phawt.