Pahnihnaah Manchester City

Pathianni zan khan EPL-ah pahnihna nih inchuhin Manchester City leh AFC Bournemouth te an inkhel a. Inkhel hmuhnawm takah 3-1 a chak Manchester City in pahnihna an luah. Inkhel dangah West Ham United in manager thar Nuno Espirito Santo hnuaiah a vawi khat nan hnehna an chang ve nawlh bawk.
Season tharah vawi thum ngawt tlawm tawh Manchester City hian pahnihna awm mek AFC Bournemouth chu Etihad Stadium-ah an mikhual. An mikhual lakah bul an tan tha lova, goal an chhuah hma hle. Inkhel tan atanga second 46-na lekah Bournemouth tan Eli Junior Kroupi chuan goal a thun nghal. He goal hi off-side vangin hnawl a ni hlauh a, City an him hram.
An goal thun pawmsak ni lo mah se Bournemouth in City an ngam zui viau a, an nawr na zui hle. An nawr nat luat an tuar lova, goal an chhuah phah thung. City midfielder Rayan Cherki chuan fing takin Erling Haaland ball a pe. Haaland hian mual chanve dawn atangin a khalh tlang a, inringtawk tak chunga pet goal in minute 17-naah hmahruaina goal a thun. Villa an hmachhawn tumin goal thun lo zeuh mah se Haaland chu goal nen a rawn let leh a, dan rual a ni lo.
Goal chhuah hmasa zawkah tang mah se Bournemouth an buai mai lova, an zam hek lo. Goal thun ngei tumin an khingpuite an nawr a, an hlawhtling thuai. Minute 25-naah Tyler Adams chuan hnaite atangin a pet goal a, Bournemouth tan goal a thun hmasak ber hmangin an si phurh a sut. Inhnaih chilh taka goal hnih a lut hi inkhel tihmuhnawm zualtu a ni a, goal thun tuma team hnihte tan khawh a hmuhnawm thei hle.
Goal an chhuah hnuin City in tan an khawh thar leh a, Cherki hnen atangin Haaland chuan ball tha tak a hmu nawn leh. Haaland hian si nghak Petrovic a bum tlang hnuin minute 33-naah awlsam takin a pet goal a, hma an hruai nawn lehna goal a thun. Goal hnih a thun hnuin Haaland hian goal thun belh theihna hun remchang zet mai a nei nawn leh a, a ball pet fingin chhe lem lo viau mah se si nghak Petrovic chuan vanneihthlak takin a lo dang hman hlauh a, Haaland hattrick siam tur a tihthlawnsak. Hattrick puitlin zo ta lo mah se Haaland hian EPL season tharah goal 13 a thun tling der tawh a, top-scorer a nihna a tizau zual zel.
Chawlhlawk hnu lamah inkhel a hmuhnawm chhunzawm a, City in goal khat an thun belh leh. Nico O’Reilly chuan minute 60-naah an goal thumna thunin, an chakna an nemnghet. O’Relly goal thun hnu hian goal dang a luh belh thei tawh lova, City chuan an mualah hnehna changin point thum hlu tak an hmu.
Pahnihna ni mek AFC Bournmouth lakah hnehna an chan vangin City hian khelh 10 atanga point 19 hmuin pahnihnaah an inhlangkai a, Bournemouth an lehpel. City lakah an tlawm vangin Bournemouth hi pahnihna atangin palinaah an tlahnia ve thung.
City hian inkhel hautak an hmachhawn zui a ngai dawn. Nilai zan hian Champions League-ah German club lian Borussia Dortmund an hmachhawn ang a. Inrinni zanah EPL a champion lai Liverpool chu Etihad stadium-ah an mikhual zui leh ang. Biurnemouth hian hahchawlhna hun tha an nei hlek ang a, Pathianni zanah Aston Villa an hmachhawn zui ve leh ang.
West Ham an chak
Pathianni zana inkhel dangah table hnuai lamah awm a, tlahniam thei dinhmuna ding ngar ngar West Ham United chuan an mikhual Newcastle United an hneh nawlh a, point thum hlu tak an hmu.
London Stadium-a lenglut Newcastle in bul an tan tha viau a, Jacob Murphy chuan inkhel tan atanga minute lina lekah hmahruaina goal a thun nghal. Hma taka goal an chhuah hi West Ham tan Lucas Paquetá chuan minute 35-naah an sut a. Sven Botman own goal hmanga hma an hruai let hnuin Tomás Soucek chuan hun pek belh minute 90’+7’-ah an goal thumna thunin an chakna a nem nghet a, manager thar Nuno Espirito Santo hnuaiah a vawi khat nan hnehna an chang ve ta nawlh a ni.
An mualah hnehna chang bawk mah se West Ham hian khelh 10 atanga point 7 hmuin relegation zone an la chhuahsan thei chuang lo. Inrinni zan hian Burnley an mikhual zui leh dawn a, an mualah an chak zawn thei a nih chuan phur thar leh inrintawkna sang zawk nen an inlan zui ang a, hma an sawn phah ngei a rinawm. Hetihlai hian khelh 10 atanga point 12 hmuin Newcastle hian 13-na an luah ve thung.