World No 135 lakah Alcaraz mualpho!

World No 135 lakah Alcaraz mualpho!
Rome khawpuia Italian Open khelh mek third round match pakhatah a chhuah hrim hrim avanga Novak Djokovic lehpela ATP ranking thara world number one ni chho leh tur Carlos Alcaraz chu Thawh-tanni khan Hungarian qualifier Fabian Marozsan lakah 6-3, 7-6(4)-in a tlawm a, clay title vawithum lak zawn tlin tumna a puitlin zo ta em em bik lo!
Kum 20 mi Spaniard Alcaraz hi a zawnin Barcelona leh Madrid tournament-ah khan a champion hlimhlawt a, tunthla tawp atanga khelh tan tur French Open-ah pawh rinkai ber tur a nih hmel a, a rimtawng ve deuh nge qualifier kum 23 mi laka a tlawm ta mai hi beisei loh result a ni.
Rome khawpuia a match hnihnaah Alcaraz khan a khelh thin dan a pha lo hle a, a bul tan dan a derthawng nghal hrim hrim bawk a, world number 135 Marozsan laka tlawm em em kha chu tumahin an beisei loh tur a ni!
Budapest tlangval laka a chak lohna kha clay season kal lai match 22 a khelh tawha vawihnih a tlawmna chiah niin, 2021 Paris Masters-a Hugo Gaston a ngam loh hnuah tun kha world top 100 pawn lam player laka Spaniard chak loh vawikhatna a ni tel bawk.
World number three Daniil Medvedev chuan inkhel dangah rim taka thawk chungin Spain player Bernabe Zapata Miralles lakah 3-6, 6-1, 6-3 hnehna a chang a, Rome khaw tournament-a a vawikhatna atan last 16 a lut.
Sixth seed Andrey Rublev pawh fourth round lut zingah telin, Spaniard Alejandro Davidovich Fokina lakah 7-6(8), 6-3 hnehna a chang.
Thawhtannia Stefanos Tsitsipas leh Lorenzo Sonego inkhel bakah Alexander Zverev leh J J Wolf intum chu khuain a bumro avangin an khel zo thei lo a, nimin result tarlan hman loha khelh zawh tura dah a ni.
Game tihtawp a nih laiin Tsitsipas hian first set-ah 6-3-in hma a hruai hman a; Zverev hian Wolf lakah 6-4, 3-3-in hma a hruai ve bawk.
Hmeichhe singles draw lamah Elena Rybakina chan 6-3, 6-3-a Marketa Vondrousova sawp chungin a vawikhatna atan claycourt WTA 1000 quarter-final a lut a, Rome khawpuia tum hnih defending champion ni tawh top-ranked Iga Swiatek leh Croatian Donna Vekic inkhela chak zawk zawk a nghak.
Last 16 inkhel dangah Chinese Zheng Qinwen pawhin a chipui Wang Xiyu laka 6-4, 3-6, 6-1 hnehna nen quarter-final a lut a; American Madison Keys erawh 2-6, 6-2, 6-4-in Ukraine nula Anhelina Kalinina lakah a tlawm thung.