World Population Day-ah Mizorama pian pun kan la mamawh dan inhrilh

World Population Day 2026 pualin Thawhtanni khan Khawzawlah hun hman a ni a, bawrhsap K Vanlalthiana’n a hmanpui.
Bawrhsap chuan, 1987 July 11-a Croatia-a nau piang pakhat chu khawvela mihring tluk-leh-ding-awn 5 kan tlinna niin, UNDP (United Nations Development Programme) chuan a chhinchhiah a, chumi denchhen chuan kum 1990 atang khan United Nations General Assembly chuan July 11 chu khawvel puma World Population Day-a hman turin a puang tih a sawi. Kuminah khawvela mihring awm zat hi tluk-leh-dingawn 8.3 niin, mithiamte chhut danin, kum 2100-ah chuan tluk leh dingawn 10.9 a ni dawn tih a sawi a ni.
Khawzawl district-ah mihring awm zat an pung tlem hle a, pianpun an mamawh tih sawiin, “Mihring kan tlem chuan ram hmasawn a harsa a, ram leh hnam dinchhuahna turin pianpun bakah pempun pawh a pawimawh,” a ti.
Chutih rualin, kan ram leilung dinhmun hrereng a, kan eizawnna ngaihtuah chunga mithiamte thurawn ngaichang zelin, awmze nei taka kan ram leh hnam humhalh leh tihhmasawnna atan pianpun lama rilru seng turin K Vanlalthiana chuan a chah.
World Population Day-in thil tum zingah, fa enkawlnaa mawhphurhna tha taka hlen chhuak tur chuan naupang lutuk emaw zing lutuka fa neih loh tur a ni a. Naupang lutuka fa neih leh chhang zing lutuka fa neih avanga harsatna thleng thei chu, naute-ah thla kim loa pian, pianhlima te emaw zang lutuk, thanthu leh thihna hial thlen thei a ni. Nu-ah thisen tlakchham, rai laia BP sang, chhul thler, rilru lama harsatna leh thihna hial a thleng thei bawk.
Chhungkaw hlim leh hrisel din tur chuan kum tlin hnuah ngei leh chhungkua enkawl tura inrintawk hnuah chauh nupui pasal neih a pawimawh tih sawi a ni a. Nu HIV kai pawh nau pai hma thla 6 atanga ART tha taka an lak chuan HIV kaichhawng loin fa an nei thei tih sawi a ni.
Mizoramah total fertility rate (hmeichhia-in a dam chhunga fa a neih zat) chu 1.6 chauh a ni a, ram leh hnam humhalhna atan puitling chin chuan pianpun lama ngaihtuahna sen a pawimawh tih pawh sawi a ni.