World TB Day-ah Mizoramah ngawr natna vei 2000 chuang

World TB Day-ah Mizoramah ngawr natna vei 2000 chuang
Zirtawpni khan World TB Day a ni a, Aizawlah pawh Assembly Annexe-ah larsap hovin he ni hi hman a ni. Larsap chuan Mizoramah ngawr (TB) natna vei mi 2000 chuang an awm thu a sawi.
Tunah hian ngawr (TB) natna vei 2000 chuang Mizoramah an awm mek a, TB vei te tana chaw tha leina thawhtu – Nikshay erawh mi 72 chiah an la awm mek a ti.
2030-ah khawvelah ngawr natna nuaibo tumin Khawvela ram zawng zawngin intiamkamna an nei tih a sawi a, India ramah 2025 ral hmain ngawr natna tihrem tum a nih thu sawiin, ngawr natna umbo tura PM TB Mukt Bharat Abhiyaan hmalakna a sawifiah chhunzawm a, sorkar leh khua leh tui zawng zawngte thawhhona a ni a ti. He hmalaknaah hian ngawr natna vei enkawlna chu mi thahnemngai leh mi thilphal te’n thilpek hmanga an thlawp theihna tur, Nikshay Mitra program chhawp a ni a, Nikshay Mitra program hnuaiah hian ngawr natna veite mamawh em em, chaw tha (nutrition) thla khata dam lo pakhat tan Rs 650/ chhutin a thawh theih tih a sawi.
Larsap hian Mizoramah PM TB Mukh Bharat Abhiyan chu Raj Bhavan-ah September 19, 2022 khan Mizorama kalpui turin a hawng tih a sawi a, a bultanna atan ngawr natna vei 20 te Nikshay Mitra kaltlangin a chhawmdawl tih a sawi. Hemi hnua hian health minister leh a thawhpui minister leh MLA thenkhatte, ADC hotute leh mimal thahnemngaite pawhin he rawngbawlna hi an zawm tih a sawi a, “TB vei te tana chaw tha thawhtute chungah lawmthu sawiin midang tam tak he rawngbawlnaah hian an rawn tel duh ka ring a. Chung mi te chu rawn penchhuak turin ka sawm a. Mimal chauh ni lovin Mizoramah chuan tlawmngaipawl lian tak tak leh thawk tha tak an awm a. Heng YMA, MHIP, MUP, zirlai pawl te hi rawn tel turin ka sawm a. Kohhran hruaitute pawh he hmalakna thlawp turin ka sawm a ni,” a ti.
Health Department-in ngawr natna umbo tura theihtawp a chhuah chu chhuanawm a tih thu a sawi a, hei hi tihhlawhtlin a nih chuan AIDS, cancer, etc. huanga hmalakna te pawh a chak sawtin a rinawm tih a sawi.
He hunah hian National TB Elimination Program (NTEP) huanga kum riat chhunga hmalakna tarlan a ni a, tehfung thenkhatah hmasawnna hmuh tur a awm laiin tanlakna tur a la awm bawk. 2022 statistics-ah chuan Mizoramah ngawr natna vei 2081 hmuhchhuah a ni a, he natna veite hi enkawl dam ni tlangpuiin ngawr natna enkawlna dawngtute hlawhtlinna hi 2015 atang khan 85% chunglam ni char charin 2022 khan 87% a ni. Ngawr natna vei zingah multi-drug resistance (MDR) case 117 enkawl mek a ni. 2022 khan MDR case enkawl zinga 73% a hlawhtling a, ngawr natna thihpuitu zat erawh kum riat chhungin tlem lam a la pan meuh lo a, 2022 khan mi 74 he natna avang hian an boral a ni.