‘Year of Consolidation’ an tih hi ‘Thlanchhuahte Invulh Kum’ tihna – Vanlalruata

On Apr 27, 2024 6 0

ZPM kaihhruai sawrkar thar chu ‘thlanchhuahte invulhna’ mai a nih a rin thu PC president Vanlalruata chuan a sawi a. ‘Year of Consolidation’ an tih fo pawh ‘Thlanchhuahte invulh Kum’ tihna ni maia a lan thu a sawi.
Chanchinbumite hnena a sawi danin, PC president chuan ZPM kaihhruai sawrkarin budget a pharh hmasak ber, chief minister leh minister dang thusawi thin leh Assembly speaker-in lirthei thar a lei der tawh danah, inrenchem sawi uarin ‘year of consolidation’ an sawi nasat lai leh chief minister tiama minister-ten lirthei pakhat an kawl tur thu leh lirthei an lei loh tur thu an sawi nasat laiin, lirthei pakhat aia tam an kawl hlawm ni mai loin speaker phei chuan lirthei changkang tak, cheng nuai 28 man vel a lei der tawh tih a sawi.
ZPM kaihhruai sawrkarin budget a siam hmasak bera thlanchhuahte invulhna tur nasa lutuk chu PC party chuan a ngaimawh tih Vanlalruata hian sawiin, “Budget kan en chuan minister leh MLA-te invulhna tur uchuak tak a lang. MLA-ten pung tlem special-a an puk thin, a hma kuma cheng nuai 200 hman thinnaah nuai 1050 lawdah a ni a. MLA LAD Fund a hmaa cheng nuai 6000 hman kha nuai 8000-ah an tipung. Kum hmasa lama Assembly Budget-a wages-a cheng nuai 101.16 an hmannaa nuai 141.50 hman an tum hi invulhna turu tak a ni a, zinna (domestic travel expenses) atana nuai 111 hmannaa nuai 144 hman an tum hi nuamtawlna hawi a ni bawk,” a ti.
MLA chekawite tana wages-a cheng nuai 60 vel hman thinnaah kuminah nuai 99.50 ruahman a nih thu te, minister leh MLA ten ruang an phurhna tur nuai 500 ruahman a nih thu pawh sawiin, “Kan party chuan uchuak kan ti hle. An sawi thin, Year of Consolidation an tih hi, ‘Thlanchhuahte Invulh Kum (Year of Consolidation for the Elected)’ tihna ni maiin kan hria,” PC president hian a ti.
Sawrkar chu mipui tana hlawkna (for the people) ni tura mipuiin kan duh laiin, thlanchhuahte tana hlawkna (for the elected) a ni leh tho chu pawi an ti a. PC party chuan mipui tan hma a la nasa dawn tih a sawi a ni.