Yemen-a Indian lawng kap pil, Indian 13 chhanchhuak

Yemen-a Indian lawng kap pil, Indian 13 chhanchhuak
Yemen vaukamah Indian sumdawng lawng kah niin a thawk Indian 13 chu him taka chhanchhuah an ni a. Indian external affairs ministry chuan he thilthleng hi demin sumdawng lawngte beih a ni fo chu tihtawp a tul thu a sawi nawn leh.
Union Shipping Minister Sarbananda Sonowal-a chuan social media-ah bungraw phur lawng, MSV Faize Noore Oliya hi Yemeni tuipui bulah ‘engin emaw a fuh’ hnuah a pil tih Thawhlehni khan a tar lang a. Yemen-a sorkar lamtang, National Resistance Forces chuan lawng hi an ram khawthlang lam tuipui kamah ‘puak thei phur lawnglengin a bei’ niin a sawi ve thung.
“August 4, 2026-a Yemen vaukam, Red Sea-a India sumdawn lawng, MSV Faize Noore Oliya beihna hi kan dem tak zet,” tiin external affairs ministre chuan thu a chhuah a. Sonowal-a pawhin India-in ‘mahni inveng thei lo lawng kal lai tul miah lova beih chu a dem tak zet’ tih a sawi bawk.
Lawngah hian thawktu 14 an chuang a, an zinga 13 hi Indian niin pakhat hi Yemeni a ni a, an vai hian Yemeni Navy leh Coast Guard tang dunin chhanchhuakin Mokha lawng chawlhnaah an dah.
Saudi Arabia-a Indian embassy chuan thil thleng hi thlithlaiin Yemeni tnuneitute nen pawh thawktute himna tur an ngaihtuah reng tih thu an chhuah a. Yemeni thuneituten an puihna avangin lawm thu an hrilh bawk.
Thuchhuahah chuan Asia khawthlanga sumdawng lawngte beih a la ni chhunzawm reng chu ‘pawi a ti tak zet’ tih tar lan a ni a. Heng laia sumdawng lawng beih thin chu a tawp ngei a tul thu leh ‘tu ta bik mah ni lo tuipuia zalen leh sumdawng lawngte tha takin an kal ngei tur a ni a, a, khawvel huap dan zawma a hma thei anga dan pangngai anga a awm leh ngei a ngai’ tih tar lan a ni bawk.
Sonowal-a chuan Director General Maritime Administration hnenah ‘rang takin agency zawng zawngte nen tangruala helai vela tuipuiua Indian hnathawkte himna tur tifel tura che turin’ a hrilh tih a sawi.
Asia khawthlanga buaina chhuak mekah hian Indian thi 16 zinga 10 chu tuipuia lawnga hnathawkte an ni a. Tun hnaiah Black Sea-a Russia leh Ukraine buaina avangin sumdawng lawng beihnaah Indian panga an thi tawh bawk.
Yemen-a sorkar lamtang, National Resistance Forces chuan Faize Noore Oliya hi Red Sea-a Al Hudaydah chhim lam tuipui mel 13-a a kal laiin beih a ni tih a sawi a. Tute mahin an tihah an la chhal lo.
Beihna hi thla hmasa atanga Red Sea leh Bab al-Mandab Strait-a lawng kalte himna a derthawng thar leh tih sawi a awm mek laia thleng a ni a. July 20 khan Iran-in a puih Houthi helhovin tuikawng pawimawh tak, Red Sea atanga Gulf of Aden leh Arabian Sea chhuahna, Bab al-Mandab Strait telin Saudi Arabia chu ‘lawng kal theih lova dan’ a ni tih a puang a ni.
Al Hudaydah hi Houthi-te thununna hnuaia awm niin Red Sea chhak lam vaukam, lawng kalna kawng pawimawh tak bul maia awm a ni.