VC lehkha laka sum chawitir mak an ti

thenzawla Village Council /Court chuan VC lehkha hrang hrangah lakah sum an chawitir ta chu mak an tih thu MNF party chuan an sawi a. VC hriatpuina lehkha print man an nei lo a nih chuan mipuiin a thlawna VC lehkha an lak zui theihnan an print sak thei tih an sawi.
Serchhip West Block MNF thenzawl thuchhuak chuan, thenzawla Village Council /Court kal tawh zawng zawngten an tih ngai loh, tun August atanga hman tan turin thenzawla ZPM VC-ten VC hriatpuina lehkha chi hrang hrang lak man pakhat Rs.20 an ti leh ILP kaihhnawih VC lehkhaah Rs.500 lak an ti tih a sawi a. Mipui rawngbawl hna thawk tura inzuarten thlantlin an nih hnuah mipui rawk zawng leh mipui sum it a, mipui phurrit siam zawngin an ti leh si, tiin, mipui rawn leh ngaihdan pawh la hmasa loa, a hmaa sum chawi ngai lohnaa sum tam tham tak lak an rel chu anmahni thlangtu mipui zahlohnaah an ngai tih a sawi.
Sawrkar laipuiin own source revenue ngaihtuah tura a ti a nih pawhin, mipui harsatna hria a, sum lak awm tawk deuh thlirthiam thin turin an ngen tih sawiin, ILP mamawha buaipuite pawh thenzawl khawchhunga harsa taka intuak a, in sa ve thei an awm tih hriatpui se an duh tih a sawi a ni.
Hun engemawchen atang khan thenzawl khawchhung bikah chhun leh zan lamah power supply a mumal loa, a bikin electric current hmanga eizawngten harsatna an tawk nasa tih Serchhip West Block MNF hian sawi bawkin, Power & Electricity department thenzawl thawktute an indaih loa, current siamin an hah thin hle a. Hetihlai mek hian, tunhnai khan P&E thenzawla junior engineer chu a aiawh dah loin sawn a ni tih a sawi.
tunah hian JE pawh nei loin an awm mek a. A rang thei ang bera JE nghet pangngai dah turin sawrkar an phut tih sawiin, ‘thenzawl hi khawpui thangchak tak kan ni a, chief minister bial kan ni mek a, tunhma atanga khawtlang hruaituten hma an lo lak tawh angin P&E department office hi Sub-Division ah min hlankai sak a, a taka function tir turin sawrkar kan ngen a ni,’ a ti.