YLA inkhawmpui hmang mek

YLA inkhawmpui hmang mek
Young Lai Association (YLA) General Conference vawi 30-na chu Thawhlehni zan khan neih tan a ni a. Palai lawmna inkhawm niin, Lawngtlai East bialtu MLA, adviser to chief minister Dr Lorrain Lalpekliana Chinzah chuan a hmanpui a. Inkhawmpui neihna Chandmary Recreational Centre Lawngtlai chu a hawng nghal.
Khawtlang leh ram siamtha turin mitinin mawhphurhna an neih rualin, thalaite mawhphurhna a sang bik hle a, chhiat thata khawtlang enkawltu ber an nih avangin thalaiten nun vawn uluk a tul takzet tih Dr Lorrain Lalpekliana Chinzah hian a sawi a. Myanmar leh Bangladesh ram buai avanga raltlan lo lutte chu ruihhlo leh dan phal loh laka fihlim tura chahin, u leh nau an nih anga Lairam leh hnam hmangaih pui turin a sawm.
HIV bikah Lawngtlai chu a hluarna district a ni chho mek tih sawiin, inchiuna thianghlim lo inhmantawm leh mipat hmeichhiatna hman kawnga fimkhur thar turin YLA member-te a chah.
Kumin hi YLA kum 50 tlin, Golden Jubilee a ni a; YLA general conference hi vawiin – November 21 thleng neih a ni ang.