YMA Jubilee pualin in hmun nei lote MLA-in in hmun leisak

YMA Jubilee pualin in hmun nei lote MLA-in in hmun leisak
YMA North Chawnpui Branch chuan an kum 50 tlin, Golden Jubilee chu Zirtawpni khan an lawm a. Serlui bialtu MLA Lalrinsanga Ralte chuan hmanpuiin, Jubilee puala lungphun a hawng.
Bialtu MLA hian Jubilee lawmpuina atan hian North Chawnpui khuaa mi harsa leh rethei, in hmun leina nei lo chhungkaw engemawzat tan in hmun theh tur a leisak chu N. Chawnpui VCP hnenah a hlan nghal a ni.
Hnam dangin an neih ve loh, mi nawlpui tel theihna pawl, ram leh hnam humhalh kawnga theihtawp chhuah thin YMA kan nei chu Mizote vanneihna a ni, Lalrinsanga Ralte hian tiin, “Pathianin ram min pek humhalh hi a chhunga chengte mawhphurhna a ni,” a ti. A bikin thalai leh zirlaite chu zirna leh thiamna hmanga ram la a, ram leh hnam tan theihtawpa tang zel turin a chah.
Jubilee hmanpuitu dang, Central YMA asst. secretary Fabian Lalfakawma chuan ram leh hnam humhalh tur kan nei chu a lawmawm takzet tih a sawi a. Ram leh hnam humhalh kawngah YMA chuan theihtawp chhuahin hma a la thin a; YMA member-te chu daido tur kan ni a, ruihhlo do, zirna ngaihpawimawh leh Zo nun zemawi chawisan kawngah hma lak thar sauh sauh a tul tih a sawi a ni.
Golden Jubilee lawmnaah hian hruaitu hluite chawimawi an ni a. YMA N Chawnpui Branch hi 1974 October 15-a din niin, tunah YMA member 220 an awm mek.