YMA nen inthlan tur sawidun

Lunglei district bawrhsap, district election officer ni bawk Ramdinliani chuan Thawhlehni khan YMA Sub Hqrs Lunglei hruaitute chu inthlanpui neih tur chungchang a sawipui.
Inthlan felfai leh muanawm neih theih nan YMA-in sawrkar a puih leh puih loh chuan kawngro a su hle tih sawiin, inthlanpuiah pawh theitawp chhuaha thawhpui turin a ngen tih bawrhsap hian a sawi a. Vote thlak ni a Voters’ Assistant Booth atanga polling official-te leh security mite tanpui kawngah, khaw hrang hranga polling party lo buaipui kawngah, mitinin model code of conduct kan zawm that theih nana hma lak kawngah, zu leh ruitheihthil lengvak tur ven kawngah, dik lo taka therhlo leh sum hman tumte ven kawngah, kum upate leh pianphunga rualban lo (disabled) leh voters chakvak lo (infirm voters) te vote thlak tura tanpui kawngah leh thildangah sawrkarin YMA a mamawhna a tam hle tih a sawi a ni.
YMA Sub Hqrs Lunglei hruaitute chuan theitawp chhuaha an thawhpui tur thu bawrhsap hi hrilhin, hun kal tawha inthlana an tawnhriat leh an thil ngaimawh an sawi a. Thurawn inpe tawn zel chunga boruak muanawm tak hnuaia inthlan felfai leh thianghlim tak a awm theih nan chak taka thawkho zel turin an rel a ni.