Branch YMA-ah hmeichhia hi office bearer an ni ngai vak lo tiin a sawi theih ang a, president an ni ngai lo tiin a sawi theih bawk ang. Sakawrtuichhunah chuan kumina an branch president chu Rebecca Lalruatkimi a ni; 2010 velah khan Sairang Branch-ah Teresa Rothangpuii a lo president tawh a, ani tih lohvah chuan Sakawrtuichhun hi president atana hmeichhia thlang leh awm chhun an ni, Central YMA hruaitute’n an ti.
-- Advertisement --
Sakawrtuichhun YMA president Rebecca Lalruatkimi hi YMA-a tui taka inhmang a ni a, YMA-a a inhman vang hian lehkha a chhiar hnem phah tih a sawi.
Eizawnna lamah chuan high school zirtirtu a ni a, 2002-ah an branch-ah OB a ni tan; vice president tih loh chu a chelh vek tawh.
“YMA-a inhman chuan lehkha chhiar a ngai ka ti. Theihtawp chhuah a ngai a, lehkha pawh ka chhiar hnem phah a, mahni hriatna a tawk lo a, lehkha hi a chhiar loh theih loh,” a ti.
Lehkha chhiar nuam ti mi a nih thu a sawi a, YMA-a a inhman vang hian chumi lam kawnga tangkai tur dapin a chhiar thin a, thusawi te a ngai a, tehkhin thu tur te pawh chhiar a ngai thin tih te a sawi. “Mi an fing tawh si a, thil sawi sual te a hlauhawm a, chuvangin lehkha hi chhiar a ngai,” a ti.
YMA-ah inhmangin chanvo hrang hrang a lo chang tawh a, hengah hian hmeichhia a nih vanga harsatna a tawh sawi tur a hre lo. “Hmeichhia ka nih vanga harsatna ka tawh a awm lo. YMA te chu tangruala thiltihna a ni a, hmeichhe tan pawh a tel theih a, tangkai takin a inhman theih,” a ti a, Mizo hmeichhiate chu YMA-ah tel se, inhmang se a duh thu sawiin, “Mipa hlang nih leh hmeichhe hlang nih aiin kan inpawlh hian a dik zawk a, kan intihlim tawn a, mipa leh hmeichhia hian tangkaina kan nei ve ve. YMA-ah hian hmeichhiain tih tur leh tangkaina kan ngah,” a ti.
YMA-in ram leh hnam humhalh kum a puan thu a sawi a, hetah pawh hmeichhia an pawimawh thu sawiin, mipa ringawtin ram leh hnam an humhalh thei lo a ti/ Hnatlannaah te, khawhar inah te, YMA thiltihna hrang hrangah hmeichhe tih tur leh mipa tih tur a awm thu a sawi a, hmeichhiate tan YMA hi inhmanna tlaka a ngaih thu a sawi.
President nih a huphurhawm thu a sawi a, chutih rual chuan YMA-ah chuan tanrualna a pawimawh thu sawiin, “Chanvo hrang hrang ka lo chelh tawh a, hengah hian tanrualna pawimawhzia ka hmu a. YMA chu mi pakhat thua awm a ni lo a, kan vaia kan tanrualna hmun a ni,” a ti. Hruaitute chauh ni lovin member-te nena tanrualna hmun a nih thu a sawi a, “Keini vengah phei hi chuan member-te kan tangrual a, thu kan awih a, kan tanrual em avang hian president nih pawh a huphurhawm loh sawtin ka hria,” a ti.
Mizo hmeichhiate’n YMA hruaitu nih an tlin a rin thu a sawi a, “Kei pawhin ka tih theih chuan tuin nge thei lo ang? Mizo hmeichhe fel tak tak an awm a, an tan a huphurhawm loh,” a ti.
YMA-a a inhmang hi a lawm a, kawng hrang hranga hma a sawn phah thu a sawi. Inrintawkna a pek thu a sawi a, “Kan inhman tirh te chuan ka zam thei khawp mai a. Tunah pawh ka la zam tho a, mahse zam chung chunga thiltih ngai a lo tam a, zam rau rauvah kan zia telh telh a, mahni tawkah inrintawkna pawh a awm telh telh a,” a ti. Taimak kawngah pawh YMA hi hma a sawn phah tih a sawi a, rintlak nih a ngaihzia te pawh a chharchhuak tih sawiin, nun uluk tur pawhin a pui tih te a sawi bawk.
YMA thuvawn leh thiltumte a ropui thu a sawi a, YMA member te’n hei hi an hriat a ngaih thu sawiin, amah pawhin a tangkaipui thu te a sawi.
Sakawrtuichhun-ah hian YMA din tirhah chuan office bearer-ah hmeichhia an lo awm tawh thin a, chu chu 1970 hma lam a ni. 1988 velah pakhat a awm leh a, chumi hnuah Rebecca Lalruatkimi a rawn lang leh ta a ni.