YoungBoy Never Broke Again-a’n Hot 100 record a siam

YoungBoy Never Broke Again-a’n Hot 100 record a siam
YoungBoy Never Broke Again chuan kum 23 leh thla ruk leh kar hnih a upa a nihin Billboard Hot 100 a lang thei hla 100 a nei tling chiah a, hetiang ti thei naupang ber a ni. He rapper hla thar ‘Big Truck’ chu Hot 100 chart-ah No.100 a kai a, he hla hi he chart-a a hla lang thei 100-na chiah a ni bawk.
‘Big Truck’ hi a album thar ‘Don’t Try This at Home’ aTanga a single niin, he album hi Billboard 200 (albums) chart-ah No.5 kaiin, albums chart-a top 10 kai thei album 14 a neihna chiah a ni bawk.
Billboard Hot 100 chart history-ah he chart-a lang thei hla 100 chin nei hi YoungBoy nen zaithiam 13 chiah an la awm a, nikum April khan Lil Baby-a’n he mellung hi a thleng a, 2021-ah Justin Bieber, 2020-ah Chris Brown, Future leh Taylor Swift ten he mel lung hi an lo thleng tawh bawk a ni.
A hmaa he record siamtu chu Lil Baby hi niin, Hot 100-a lang thei hla 100 a neihin kum 27 leh thla li leh kar thum a upa a ni a, ani hian kum 28 leh thla 11 leh kar hnih a upa ni a 2015-a record siamtu Drake a rawn khum a ni.
YoungBoy hla he chart-a lang thei 100 zinga hla 12 te chu top 40-ah an lang pha a, a hla pakhat chu top 10-ah a lang bawk. He chart-a YoungBoy lanna hmasa ber chu September 2017 kha niin, a hla ‘Untouchable’ chu No.95-ah a debut a, chart top 40-a a lanna hmasa ber chu February 2018 niin, a hla ‘Outside Today’ chu No.31 a kai a ni.
Hot 100 chart ranking hi August ni 4, 1958 aTanga siam Tan niin, tunah hian hetiang mel lung thleng thei hnaivai deuh te chu- Eminem (95), The Weeknd (93), James Brown (91), Travis Scott (89), Lil Uzi Vert (86), Beyonce (81), Young Thug (81), 21 Savage (79) leh Juice WRLD (77) te an ni.
He chart-a lang thei hla 100 chin nei thei te chu:
294, Drake
207, Glee Cast
189, Taylor Swift
184, Lil Wayne
161, Future
141, Kanye West
134, Lil Baby
129, Nicki Minaj
114, Chris Brown
109, Elvis Presley
105, Jay-Z
105, Justin Bieber
100, YoungBoy Never Broke Again