Youth 20 Mizoram khar

Youth Services department leh Mizo Zirlai Pawl tangdunin Youth 20 Mizoram – ram leh hnam hmangaihna, ram chhanna leh hmasawnna atana intawhkhawm an buatsaih chu Ningani khan Aizawlah khar a ni.
He hun hmanpuitu chief minister Zoramthanga chuan nationalism chu hnam dang va huat a, ngaihtheih loh lam a ni loa, Pathianin min pek ram leh hnam humhalh a, dinchhuah pui hi a ni, tiin, “He ram leh hnam humhim zel hi mitin mawh a nih rualin, thalaiten mawhphurhna pawimawh em em kan nei tih hrereng ang u,” a ti.
Zofate nationalism bupui chu Mizoramah a awm a, kan chhehvel rama kan unauteah a nung reng a, beisei takin min thlir tih Zoramthanga hian a sawi. Aizawl chu an tan khawpui ralmuang leh him niin an ngai vek tih a sawi. Tunhnaiah Mizoram chu harsatna hrang hrangin tuam mah se, Pathian kaihhruainain ropui takin Mizoram a la dingchhuak dawn a, hun hnuhnunga a chanchintha hriltu atan he hnam hi a buatsaih mek tih sawiin, “Hnam thinlung nghet tak pu chungin kan ram tan thawk zel ang u,” tiin zirlai a sawm.
Youth Services minister Robert Romawia Royte chuan G-20 chungchang leh chumi hnuaia Youth-20 Movement neih a nih dan, Mizo thalaite mamawh tak thalaite ngaihtuahnaa nationalism leh patriotism tuh nghet a, hmasawnna pawimawh zia inzirtir a tul thute a sawi a. Thla hnih chhung hmun hrang hranga Y-20 Meet neihnaa mi tangkaite chungah lawmthu a sawi a ni.
Youth Services secretary Dr Lalrozama chuan ramin hma a sawn a, ram leh hnam hmangaihna thinlung, inpumkhatna tha kan mamawh zia thalaite thinlungah a thara tuh beiseiin Youth 20 Mizoram programme hi kalpui a ni tih a sawi a. Aizawl district ah intawhkhawm vawi 5 buatsaih niin, district dangah vawi 10 buatsaih a ni a, a kharna inkhawm hi intawhkhawm vawi 16-na a ni tih a sawi.
A kharna huna speaker atana ruat MZP adviser Lalthlamuana Ralte chuan ‘Youth 20 Mizoram’ thupuia hmangin thu a sawi a ni.
India ramin G-20 presidency a chelh kum denchhena hmalakna chi khat, Youth 20 Mizoram Meet on Nationalism, Patriotism & Development hi kumin July 14 atang khan neih tan a ni a, Mizoram district headquarters tinah intawhkhawm buatsaih a ni.