Youtube channel-a thudik tawk lo tihchhuah vangin sawifiah

MP inthlan vote neih zawh takah Saitual district election hotuten lirthei an hman man an pek danah inremna ang ni loa inpe ni awmin Youtube channel pakhat ‘Khawlbawm’ tih chuan a lo tichhuak a. Saitual bawrhsap Dr Lalngura Tlau chuan hei hi a sawifiah.
Saitual district election officer ni bawk hian he thil thleng hi pawi a tih thu sawiin, social media-a thil a kimchang hreloa kan chhuah mai thin chuan nghawng nasa tak a thlen thei tih a sawi. Lok Sabha inthlan neih zawh takah khan Maxi Cab Owners Association chu inremna siampui an ni a. An inremna ang chuan lirthei pakhat ni khatah Rs. 6000 leh kilometre khatah Rs.40 (actual kilometre) zel tura inremna ziah a ni. Chu inremna ang chuan sum hi an inpe tih a sawi.
Lirthei neitute an kohkhawm lai hian updown tura inberem ni se, updown-a inpek a rem loh chhan a awm lo tih sawiin, tuna an inbiakrem dan anga inpe an ni. MLA inthlan lai aia tlem zawk nia sawi pawh a dik lo, tiin, MLA inthlan lai khan ni khatah Rs. 5500 leh km khat zelah (actual) pek belh a ni a, tun tumah erawh Rs. 6000/day plus actual kilometre-a pun a ni zawk tih a sawi bawk.
Driver-te pawhin an inremna anga sum an lak tawh thu DEO hian sawiin, Khawlbawm channel neitu, Lalhmingsanga @ Hmingtea, Farm Veng Lunglei hian a video chu la thla in a sawifiahna video a tichhuak tawh a. Tun dinhmunah chuan tu chungah mah legal action lak tumna a awm rih lo a, amaherawhchu hetiang thil a awm leh chuan court-ah kalpui a ngai tawh dawn tih a sawi a ni.