Zac Efron pualin HWF-ah arsi an dah ta

High School Musical atanga khawvelin a hmelhriat, Zac Efron pualin Hollywood Walk of Fame-ah arsi an dah ta. A puala arsi hawnnaah Zac Efron chuan, “Lemchan, zai leh lam te hi ka hriat theih chin atanga lo ti ve ngar ngar tawh ka ni a, mahse, helai hmunah hian ka la ding ve ang tih chu mumang lamah pawh ka la man phak ngai loh a ni,” a ti.
Zac chuan a thiantha, a thawhpui te leh a fan-te chungah lawmthu sawiin, “A tir atanga vawiin thlenga ka tana awm te in ni,” a ti a, 17 Again-a a lo chanpui tawh, October 28-a chatuan ram pan ta Matthew Perry pawh a theihnghilh lo, “Ani nena Burr Steers (director) hnuaia thawhho kha a nuam takzet a ni. Kawng tam taka min tiphurtu leh ka career-a hmasawn tura nasa taka min nawr kaltu a ni. Matthew, ka lawm e aw, vawiin hian ka rilruah i awm reng mai,” a ti bawk.