Zalenna puan lai kha nationalism a san ber laiah ngai

February thla chawhnu lamah hian nationalist-te rilru a thar Thin a, zalenna sualtute’n nun hlui an chhui kir Thin.
1966 March ni 1-ah MNF-in Zoram tan zalenna an puang a, February ni 28 zanlai dar 12 chu ‘zero hour’ a ni. “Mizoram sorkar” an din a, chu sorkara finance minister C Lalkhawliana chuan khang lai kha Mizo nationalism leh patriotism a san ber lai a nih a ring.
“Khang lai khan nationalism khan ram a la duai duai a, Thalai phei chu nationalist kan ni vek tih tur khawp a ni a. MNF-in volunteer kan ngah a, khaw tinah kan nei a ni ber. Chu chuan nationalism boruak chu a tilangah ka ngai. Kei chuan spirit of nationalism and patriotism kha, khang lai kha a san ber lai, a highest peak-ah ka ngai,” a ti.
“Assam hnuaia kan awm lai a ni a, MLA pathum kan nei a, party ding tir MNF khan MLA pahnih a nei nghal a. Chu chu khang laia Mizote’n nationalism kan tuipuizia tilangtu a ni,” a ti bawk.
Zalenna sualtute kha ram leh hnam tan an inpe tak tak tih a sawi a, “Inpekna tak tak a ni. Ram leh hnam tana rinawm tura inpekna, thih thlenga rinawm tura inpekna a ni,” tiin an inpekna chungchang a sawi.
Treasury pawh an nei lo a, sorkar pawisa pawh ruksai-ah an dah mai Thin. An khai sawn lawp lawp a, pawisa hi a bo ngai lo. “Pawisa cheng khat mah a bo lo, ram tana inpeknaah khan rinawmna a tel a ni,” chung laia an finance minister chuan a ti.
Zalenna suala an rammut lai a thlir let a, a lung te pawh a leng Thin. Thil an tawng nasa a, hrehawm tak tak pawh an tawng hnem. A inchhir lo a, “Ka inchhir lo teh asin,” a ti. “Khang laia kan thil tawnte kha tawnhriat hlu a tling. Engmahin ka thleng phal lo ang,” a ti bawk.