Zalenna sual chanchin ziahna bu rintlak vek ring

Zalenna sualtute’n an rammut lai chanchin an ziak ta nual a, MZP-in zalenna puan ni March ni 1 puala hun an hmannaa telte chuan a rintlak vek an rin thu an sawi.
He hunah hian zirlai engemaw zat an tel a, lehkhabu hrang hrangah thil inang lo te a awm a, eng bu nge rintlak ber ang tia an zawhna chu, a rintlak vek an rin thuin an chhang a ni.
Mizo National Army-a brigadier general thin R Sangkawia, lehkhabu ziak tawh chuan, “Kan awmna a hrang theuh a, kan hriat kan ziak mai a ni,” a ti a, an awmnaa an thil tawn theuh an ziak a, hriat dan inang lo pawh a awm thei tih a sawi.
“A pawm tlak vek. Number inang lo hret hret chu a awm ang,” a ti bawk.
Lehkhabu engemaw zat lo ziak tawh Col Lalrawnliana chuan sipaite chet dan lam a ziah thin thu a sawi a, operation 50 vel chungchang a ziah thu a sawi.
“Kan ziah hi a line a inang lo a. Pachang, ngaihdan neih vek an ni a, an ngaihdan pawh a inang lo,” tiin lehkhabu ziaktu hrang hrangte chungchang a sawi.
“Khuarei Sulhnu” tih ziaktu Bualhranga, zalenna puangtu sorkar senator thin pawhin an hmuh dan theuh an ziak tih a sawi a, “Sorkar hnathawk, sipai leh politician kan hrang,” tiin an sorkarah khan politician an awm thu te, sorkar hnathawk an awm thu te, sipai an awm thu te a sawi a, mahni zawn theuhva an thil tawn an ziah thu te a sawi.
War Council secretary thin Vanlalngaia chuan, “Hnam dang independent sual chu anmahni leh anmahni an inkaphlum rem rum a, Zofate chu Pathianin min hum a,” tiin a sawi a, remna ziah dawn chanchin sawiin, khatih lai khan mipuiin independence aiin remna an mamawh zawk tiin a sawi.
Zalenna suala an chhuak kha an inchhir lo tih an sawi a, Vanlalngaia chuan kum 14 chhung hnam dang karah hnathawka a awm thu sawiin, “Ka rualawhna ber chu Mizo tih hi khawvelin hre ve se tih a ni,” tiin a rualawh thin thu a sawi. 1963-ah sorkar hna bansanin MNF a zawm tih a sawi a, “Ka rualawhna ber, khawvela Mizo hnam puanchhuahna kha ka zawm a ni,” a ti. Radio hrang hrangah Mizo tih an han puang ta tih a sawi a, “Ka lawm em em a ni,” a ti.
‘Brain wash’ an ni em tih zawhna chhangin Bualhranga chuan, “Volunteer kan ni a, tihluihna a awm lo. Mahni duhthua ramhnuaia lut kha kan ni,” a ti a, 50s vela Mizote dinhmun enin, “Awpbeh kan ni tih kha a chiang lutuk a. Pu Laldenga’n independent a sawi a, graduate rualin kan bawh a, chu chuan thingtlang lam a nghawng a,” a ti.