Zan lama lirthei riahna ruahman Stand hauh bik neih remti dawn lo

Zan lama lirthei riahna ruahman
Stand hauh bik neih remti dawn lo
Aizawl Municipal Corporation chuan zan lama lirthei riahna/ hunna tur bik a ruahman dawn a. Lirthei dah theihna hmun thlan bikah taxi tana stand hauh bik neih a remchang dawn lo tih sawi a ni.
AMC hnuaia Committee on Control of Parking & Collection of Parking Fees chu deputy mayor R Thanglura hoin Thawhlehni khan an thukhawm a. Aizawla night parking ruahman, maxi cab stand leh Berawluia Aizawl City Bus Terminal luah dan tur bakah Aizawl Municipal huamchhunga two wheeler taxi parking sawi a ni. Parking area cheithat leh chhinchhiahna siam dan tur ngaihtuah a ni bawk.
Aizawl khawpui chhungah khualzin tamtakin zana lirthei riahna an mamawh thin a, loh theih loh thil avanga zan riah ngaite tana ruahmanna mumal zawk siam dan tur sawiin, Aizawl City Traffic Police leh local council-te nen tha taka kalpui tum a ni. Aizawl khawpui chhunga veng 28-in ruahmanna an neih chu AMC-ah an thehlut tawh a ni.
Maxi cab zan riahna tur hi AMC-in ruahmanna a siam a, zan riah tulten an duh duhna hmuna ding mai loin, heng hmunah hian dah zel turin Committee chuan maxi cab neitute leh driver-te a ngen a. Aizawl city bus service-te tana terminal siam pawh hman theih a nih tawh vangin hman tan thuai nise, tia rel a ni.
Aizawl khawpui chhunga parking area siam hrang hrang chu hauh bik a remchang lo tih a ni a. Hmun thenkhata two wheeler taxi-ten an member ni lo din an phal lo thin pawh ti lo tura hriattir nise, tia rel a ni bawk.
Hei bakah hian AMC parking area hrang hranga a leng baka inhnawh hnemte endik tura rel a ni.
Thutkhawmah hian Committee on Control of Parking & Collection of Parking Fees executive corporator B Lalawmpuii bakah corporator – C Lalchhandami, Christina Roluahpuii Sailo leh David Zohmangaiha, AMC-a parking viltu officer-te, Aizawl City Traffic Police leh Transport department-a State Transport Authority member-te an tel a ni.