Zangnadawmna dawn tura lungawilote dinhmun enfiah

Lunglei leh Tlabung inkar National Highway 302 laih zauh hna thawh meka ram laksak, zangnadawmna an dawn zata lungawilote zualko chhan a hmunah enfiah a ni.
NH-302 sial zauh leh laih that hna thawh mekah kawngpuiin a sutchhiat dawn avanga an in leh lo chante hnenah zangnadawmna an dawn tur ang pek kim thawhkhat a ni tawh a. Hetihlai hian zangnadawmna an dawn tur zat an hmu lo nia inngai chhungkaw 32 chu sawrkarin arbitrator tura a ruat hnenah an zualko a; NHIDCL hotute chuan an sum dawn tur zat dawng phak lo nia inngaite zualkona hi a hmunah enfiahin, Tlabung khawchhunga chhungkaw 32 hi kawng sial a nih dawn avanga an ram chan tur an teh that sak leh a ni.
NHIDCL hian an tih tur leh bawhzui theih ang chu an zo fel tawh nia sawiin, an ram hlutzawng an chhut mila zangnadawmna an pekchhuah danah fel lo a awm lo niin an sawi. An ram hlutna bik chhut a nih danah erawh an lungawilo a nih chuan an la zualko leh thei a, chumi chifel chu Mizoram sawrkar mawhphurhna a ni tawh thung tih an sawi a ni.
Lunglei leh Tlabung inkar NH 302 sial zauh leh laih that hna hi kum 2021 tawp lam atang khan thawh tan ni mah se, tunah hian hna hi an la zo hnai lo hle a, kumin fur ruahtui tlak tam lai phei chuan lirthei tana zawh hleihtheih loh khawpa a chhiat avangin harsatna nasa tak a thlen tih sawi a ni.