Ziah ral….

Nimina MPYCC hruaitu pakhat hminga Lokayukta-a FIR thehluh chu, deputy chief minister chanpual department pakhat hnuaia dik lo taka cheng nuai 100 chuang, hnathawh awm lova ziah ral chungchang, chhui tura ngenna a ni a. FIR hi, Assembly Speaker-in USA-a a zin tuma US-a Zofa awmte hnenah a sawi behchhana siam a ni. Lokayukta hian a chhui ang a, thubuaia lut a nih tawh avangin, thil awmzia chiang zawka hriatchhuah theih turah ngai ta ila.
Mizoramah hian ‘ziah ral’ hi thil thar a ni lo; thil tlanglawn tak a ni. A chhan chu, corruption kan tih hi ‘ziah ral’ a ni ber a; chu ziah ral chu a lar em em a, a do pawh kan do nasa. Mizoram hi corruption hluarna a ni, kan tih chuan, ‘Mizoram hi sum ziah ral hluarna a ni’ tihna tluk a ni. Ziah ral dan erawh chi hrang tam tak a awm ang.
Langsar taka ‘ziah ral’ thlen fona nia lang pakhat chu, official-a zinna, lirtheia ropui taka inzui duah duah thinna hi a ni awm e. Tun hnuah hian engtiang chiahin nge ‘inzui duah duah’ hi kalpui (manage) thin a nih zui tak zel hriat a ni lo va, hemi chungchanga sawrkar thu pawimawh puan zar (office memorandum) hi mipui lam hriat phaka pholan a la awm lo niin a lang.
Hetianga official thila inzui duah duahnaah hian POL luanral tam thinzia chu sawi a ngai lo ang a, hetiang hi chu thil kalphung pangngai deuh a ni a. POL anga hmanral zat tur ruahmansa awm ve chiah lo, lam hla deuh kal changa kawnglaka ruai lo buatsaihna leh, thlennaa ruai buatsaihna senso tur hi budget lamah hmuh a ni ngai lo va, mahse inzui duah duahten anmahni pocket money atangin senso tur an phawrh hriat a ni hran lo. Heng zozaite hi eng tin nge ‘ziah ral’ a nih thin, tih hi zawhna a ni.
Hetiang nikhua hian, minister emaw, MLA emaw, Officer-te emaw zingah hian, ‘kan zinkawng kawnglaka ruai lo buatsaihtute khan senso kha khawi ami nge an hman tak? Eng tin nge ziah fel a nih? tia vei zui hi engzat nge awm thin ang?
Corruption hi ramri pawn lam atanga langsar taka min rawn runtu chu ni se, lu chhum ban chhum huamin kan lo do let ngamin a rinawm, chhung lam a nih takah hian kan do huai ngam ta lo thin niin a lang.