Zimbabwe in police ten an duty laia phone hman an khap

Zimbabwe in police ten an duty laia phone hman an khap
Zimbabwe sorkar chuan an ram police zawng zawngte chuan an duty laia mobile phone a khap.
He khapna hi hman nghal turin a ti a, police te chu an duty lai chuan an mimal thil reng reng kalsan tur a hriattir a ni.
Police zawng zawngte chu an station an thlen veleh an mobile phone te chu an pute hnena leh dahna tur hmun siamah hlan vek turin a ti a, an chawlh lai chauha hmang turin a hriattir.
Khap a nih chhan hi sorkar chuan a tarlang chiah lo a, mahse hun eiruk tumna tihtawp nan leh beih tumtute laka an inralrin reng theihna tur niin mi tam tak chuan ngai thung.
He thupek lo irhchhuahna nia lang chu Harare khawpuia traffic officer pahnih man an nihna atanga kangkai zel niin ramchhung mi tam zawkte chuan an ngai a, anni pahnih hian public transport lirthei atanga thamna an la lai social media lamah a darh vak avangin sorkar ngeng a chhun phah hle nia sawi a ni.