Zinmite hipna tur lam ngaihtuah tur din dawn

Zinmite hipna tur lam
ngaihtuah tur din dawn
Mizoram Heritage & Tourism Development Committee din dan tur relin Thawhlehni khan Tourism minister Lalnghinglova Hmar hoin thutkhawm a ni.
Thutkhawmah hian a kaihhnawih department – Tourism, Art & Culture, I&PR, Land Revenue & Settlement leh Planning & Programme Implementation hotute an tel a. United Nations Educational Scientific & Cultural Organization (UNESCO) in art hmasawnna atana a thawhpui, Association Internationale des Arts Plastiques/International Association of Art India Chapter president Manaj Saha biakrawn a ni bawk.
Tourism minister chuan kutthemthiamna hmanga lemziak mite kutchhuak (art) leh hmanlai pipute khawsak thinna hmun hluite hi kan hnam rohlu a ni a, chawisan leh vawnhim a ngai hle, tiin, khualzin hip theihna hmanraw tangkai a ni tih a sawi.
“Hnamdangte hmuh theih tura chawisang turin tunlai khawvel mila ruahmanna tha siam a pawimawh a, hetiang lama kan hmunhma neih thatte zirchiang tur leh khawvel pum huapa phochhuak thei tur Mizoram Heritage & Tourism Development Committee hi din a tul a ni,” a ti.
Mizorama pipute sulhnu la awmte tha zawka chhinchhiah leh zinmite hipnana phochhuah dan ruahmanna sawiho a ni a. He Committee din pawimawhna leh mawhphurna an neih dan tur sawi a ni bawk.