Zirlai hmeichhiate hnenah mahni inven dan zirtir dawn

Saitual district-a hmasa ber ni turin Govt. Saitual High School-ah Pipe Band Academy leh Rani Lakshmi Bai Atma Raksha Prashikshan (Self Defence for Girls programme) chu Thawhtanni khan district bawrhsap Dr Lalngura Tlau chuan a hawng.
Kum 2022 khan Mizoram Taekwondo Association of Mizoram (MATA) te leh SPD inremsiamna in, Rani Lakshmi Bai Atma Raksha Prashikshan hi Saitual district-ah bul an tan a. Kuminah district kuta dahin, district-in a kutken tan a ni. Zirlai hmeichhia, UPS (middle school) atanga higher secondary school zirlai tan he programme hi duan a ni a. Zirlai thenkhat chu he programme kaltlang hian Taekwondo game luhchilhin hlawhtlinna pawh an chang a ni.
Self defence training hi Saitual district chhunga middle, high school leh higher zirlai hmeichhiate tana ruahman a ni a, Taekwondo zirtirtu (blackbelt) 5 an awm a ni.
Pipe Band Academy hi PAB 2023-2024 in a pawmsak tawh angin, kumin hian district 10-a din tur a ni a. District office atangin Pipe Band Academy awmna tur school thlang tura tih niin, District Project Office, Samagra Shiksha Saitual District chuan Govt. Saitual High School hi a thlang a. Bul tanna atan Rs. 400,000 a dawng a ni. Pawl 9-te tana ruahman a ni.