Zirlai intihlum pung, a hma kum aiin 4.3%-in tam

National Crime Records Bureau (NCRB)-in a chhinchhiahna a tihchhuahah chuan India-a zirlai intihhlum chu kum 2024 khan 14,488-ah kaiin a tam ber kum a ni a, kum 2023-a mi 13,892 intihlum aiin 4.3%-in a tam.
Ram pum huapa mahni intihhlum zat chu 0.4%-in a tlahniam thung a, he hun chhung vek hian 1,71,418 atangin 1,70,746-ah a tlahniam a ni.
Kum 2024-a mahni intihhlum zat chu kum nga kal ta aiin 11.6% zetin a pung a, kum 2020 khan mi 1,53,052 intihlum an awm a. Kum 10 kalta aiin 27.8% zetin a pung a, kum 2015 kha chuan mi 1,33,623 intihlum an awm.
Zirlai intihhlum bik hi a pung nasa hle a, kum 2020 khan zirlai 12,526 intihlumin 15.7% zetin a pung a, kum 2015-ah 8,934 an intihlum bawk a, kum 10 kal ta aiin 62.2% zetin kum 2014-ah intihlum an tam a ni.
Kum 2015 leh 2024 inkar khan zirlai mahni intihhlum 1,15,850 zet an awm anga chhinchhiah a ni.
NCRB-in a chhinchhiahna a tihchhuah tharah hian kum 2024 chhunga mahni intihhlum zawng zawng 1,70,746 zinga 8.5% chu zirlai an ni a, kum 2023 khan intihlum mi 1,71,418 zinga 8.1% a ni a, kum 2020-a mahni intihhlum 1,53,052 zinga 8.2% a ni a. Kum 2015 khan intihlum mi 1,33,623 awmin heng zinga 6.7% chu zirlai an ni.
Mi thiamte chuan zirlai mahni intihhlum pung zel hi zirna lama nawrna, rilru lama harsatna enkawl loh leh thlawpna chak tawk awm loh vanga zirlai rilru hriselna lama harsatna lian zel a lantir tih an sawi a, counseling system chak zawk, hmalak hma, sorkar helpline hriatthiamna leh rilru lam hriselna lama puihna awlsam zawka hmuh theiha awm a tul thu an sawi.
Institute of Human Behavior & Allied Sciences (IHBAS), Delhi-a deputy medical superintendent, psychiatry professor ni bawk, Dr Om Prakash-a chuan “Exam pressure, inelna nasa, nu leh pate beisei, career lungkhamna leh social media te hi zirlai mahni intihhlum pung chhan lian ber niin kan hmu fo thin a. Hetih rual hian ka enkawl tawhte atanga ka hriat chu mahni intihhlum tumte hi enkawl loh lungngaihna, lungkhamna, mi ang pha lo nia inhriatna, a hun taka hma lak loh leh rilru lama harsatna thuk tak dang emaw hi a chhan a ni thin,” a ti.
Kum 2024 chhunga mahni intihhlum zirlai 14,488-te hi mipa 7,669 leh hmeichhia 6,819 an ni a. Intihhlum tamna ber chu Maharashtra (13.2%) a ni a, Uttar Pradesh (10.9%), Madhya Pradesh (10%) leh Tamil Nadu (8.9%)-in an dawt a ni.
Zirlai mahni intihhlum tam ber chu Class 10 emaw, secondary level emaw thlenga zir (25.6%) an ni a. Class 8 leh middle level (17.7%), Class 12 leh a aia sang (18.3%), Class 5 leh primary level (14.4%) leh mi mal lehkha thiam lo (10.1%) te an ni a. Mahni intihhlum zinga 5.6% chu graduate emaw, a aia sang emaw an ni.