Zirlai naupang himna’n school chawlh puan a ni – Chief minister

Tunhnaia ruahsur nasa avanga school chawlh puan thin chu leimin leh chhiatna dang thleng thei taka zirlai naupangte himna atana tih a ni tih chief minister Lalduhoma chuan a sawi.
Tunlaia fur ruahtui tla nasaah District Disaster Management Authority lamin school chawlh a puan thin chungchangah chief minister chuan Nilaini khan a social media account lamah thuchah siamin, ‘Ruahsur avangin nunphung a khaihlak nasa hle a. Leimin leh Sabereka Khuangkaih a thleng foa, naupangte himnan zirna in khar a tul thin,’ a ti.
Kawng ping leh transformer chhia emaw power line chhia emaw vanga nitin hnathawhna lama harsatna tawk pawh tam tak kan awm ang, tiin, sawrkar chuan a theih ang angin heng chhiatna thleng thin hi a umzui nghal zel tih chief minister hian a sawi a. Harsatna nasa zawk kan tawh loh nan district tina DC, SP leh official dangte an inralring reng a, a tul anga lo be pawp thuai thin turin mipui a chah.